LUGUD… maniampukaking lugud, sientu porsientu yang makabie masiglang aske king Bie, at ya murin makabieng maralumdum a aske king bie tamu. King poesia ning kapatad tamung Rodrigo Sicat, ING PANALALA KANG INANG, makulimlim ya karing mumuna nang estropa. Dapot mengibabo ing Kasalpantayanan, memupus ya king pamananggap king kaburian ning Dios nung nu mesala ya aske ing paglako nng kaluguran a Inang. Lugud…lugud, ing sangkanning Bie, nukarinman.
-Maria Teresa Magtuloy-Evangelista
Metung karing pagmaragul, tamu bilang Kapampangan
ding tradisyun at kultura, a kekatang agisingan
king bista’t man ing paniulung, marayu neng tutu disan
mabie la pa angga ngeni’t, e tibubus mekalinguan
a anti mo ring ariya, ring kasebian at diparan
ampon ing pamagmasusi karing fiesta ring balayan
Ing mal tamung lalawigan, ing tatalan king titulu
king galal a peka-siduan, o kabisera ning pasku
ing ligligan da ring parul, king siyudad ning Sam Fernandu
dangalan ing iyatad na, karing maldang Pilipinu
king tindag da retang parul, mibulalag tamung ustu
e mu king kekatang bangsa, nun e mabilug a yatu
Neng panaun ning maleldo, ing baryu San Perdo Cutud
dadayuan de ring turistang, debotu kang Apung Hesus
ing pangaylasa ning Kristung kekatang talapangabus
king aldo ning Biyernis Santu, apanalben mu ngang lubus
manibatan king samula, a dekap de’ retang hudyus
angga king mibayube yang mipaku at mete king krus
Nung magdulap kang sisig a, pekamaniaman a lasa
pesang bulig, lutung ange, mamasyal ka king Pampanga
nung bobotu ing buri mu, o tamalis a awsan da
suman ebus at bulagta, king Cabalantian ka munta
karas naman karing pakwang malutu at la mallorca
ampon buru, kabalitan, ya ing bale’ning Candaba
At nung bisa kang maglimbang, mamasyal ka mabalacat
ing hot air balloon festival, ayalben mu karin king Clark
ating resort a masanting king dane na ning Arayat
antimurin ing poracay a sakup ning balen Porac
at king bulkang pinatubu, ating lugal a sisikat
a inaus dang “NABUKLOD”, a megi nang tourist spot
King museo ning Angeles, karin ta no man akit ngan
ding miyayaliwang libru’t, kawatasan Kapampangan
ila pin ding magpatutu, king tagle rang kadakilan
ding bayani na ning lahing, mekipamuk king kalayan
maging ding antigung gamit, ding kekatang pipumpunan
king museo ning Angeles, karin la ngan makasimpan
Ita man istasyun ning tren, a malapit kapitolyu
ya ing meging piping saksi, karing dusa at kalbaryu
da ring pilipinu ampon kawal a amerikanu
king death march a mitatak king kasalesayan ning yatu
manibat Samal Bataan, papunta king San Fernandu
kaibat ning mapilan oras, kingTarlac no diniretsu
Mabandi ya ing Pampanga, king kultura at tradisyun
a pagmasusian ta pa king, salukuyan a panaun
deti e la melumpawi, at midian pamikatagun
ban kekatang ipamana, karing tuking henerasyun
ing amanu antimurin, pasiknangan ya pundasyun
e tamu paimburisan, a mipase ya king gabun
Tara na king labuad da ring, mangatapang at maginu
mangalagu, matenakan, marangal at simpatiku
tara na king lalawigan, a pigkalam na ning Guinu
ampon karing banding likas, a binie na kekatamu
tara na at ipasuala mabilug a unibersu
a ing labuad Kapampangan, dai de ring maprinsipyu
© Vhelle V. Garcia
April 1, 2020
UAE
1)
Inglamu mo kapilan pa, sumangid dalan daka ikit,
E ku balu nanung sangkan kabud naku dinalakit
At ban e ku maulatang makyagnan keka’t milapit
Kunwari mong pasyuk-pasyuk
kambe ning maina kung dalit.
2)
Pegsikapan keng pekbaluan ing lagyu mu at pilidu
Kararagling mig-friend request, at ing pamun ku tinggap mu.
Pengalkal ke ing profile mu’t nalben reng kekang letratu
At ban e ka akalingwan ‘nabe daka king friends list ku
3)
Anya manibat kanita, megumpisa kung mengarap
At magparasakali kung.. e kamu metung paninap
Uling misan ing pusu ku, mengulila ne keng lingap
Inya mibalut king kanlap, itang lugud a masapsap.
4)
Asna ku king kakuswelu potang makibat ka kaku
Bistat man keni mung peysbuk, karin kata mipagkuentu
Angyang king ditak mung oras, at makuyad mung komentu
Panulu lang makapasno, babie tula keng pusu ku.
5)
Talabasa ning kudta ku, e muku sana pagsisti
Nung laman ning susulat ku, pamamuri lang matikdi
Tingkap nala ning diwa ku, ketang dapug a mamapi
At saka nala pebili, retang amanung mabinti.
6)
Ining makuyad kung kuentu angu ya keng talambie ku
Menibat king kakaluluan at pengarapan masensu
Uwa,dinugpa ne, dapot..sinulapong pesibayu
Uling e ya ustu lingap, at e ku biasang sinuyu.
7)
Makanyan man ing milyari, ala naman palsalanan
Nung liguran kung mas sobra at sopan ing mangailangan
Nabusuan ku itang tuksu, ketang maling katuliran,
Uling ing yaman tatalnan, e mu dalan king kutkutan.
8)
Nganang Monico Mercado, sabla keti babo yatu
Dakal bage manaliwa, pati ugali ning tau
Dapot mayap at dakila, lakwan mu king balayan mu
E mabura kareng tau, o kalingwan ing lagyu mu.
(© WakaOjie Mangalindan Pena)
12 Disiembre 2022
😢Adwa(2) na ka pin banua 😢
Bubut ku man angga ngeni, king kanakung pamanyulat
Anti kumo itang bingut, kilub kuna mangalawat
Manintun lingap at kawul, king lugud yung e mu sukat
Ban tinta ning kakung pluma, gumapang yang e manyinat.
Ika..Wa, Ika pala ing panenayan kung salangsang
Uling e mo paimburisan, detang asal a magaspang
Inya nang ikang linele, penabi mo reng kasalang
At tututul kang miyapag, ulam da king kakung dulang.
Balamu mo kapilan pa,anyang muna katang mikit
ing lungkut ding kekang mata, sasalikut mu lang pilit
ketang e ku apiwari, mengangas ke’kang miglabit
ban akwa ke mung arakap, ing timan mu ampon gigit.
King pilan ukdung pamitabmu, potang ika nang mamiru
ing sagakgak mu at ayli, ding magpagising kanaku
ing musika kung pamitan, potang gumale ka pinu
kening kilub ning pusu ku, mala-kundiman ing tonu.
Angyang saglit mu’t penandit, masaya kung kayabe ka
ketang lugal a makiput, nung nu mipamingua kata
antimo ring adwang asan, ketang agus sasagana
alang milapit mangangas, karetang e ta kasangga.
Dapot ngeni magsalbat ya, ing pusu ku keng kasakit
E na binang asukmaman, itang kaplas a darantik
Biglang kalma,mepayapa, ing siwala ding kuliglig
Anyang pabalu da kakung, memun naka keti sulip.
Saskup ya man ing salu ku, uling aku lakwan muna
Dadalumdum ing ikit ku, king banuang e na mibata
Kayagnan na lang miglulam, dening magluwa kung mata
At king balang pagpiyak ku, akakit kuyng kekang lupa.
Randam ku ing kekang tula, paglako mu keti yatu
Uling manaya ne keka, kapisi ning kekang pusu
Bistat man ikeng melakwan, e kalingwan ing bilin mu
Ing paglualu anggang mabie, ing matatda ta’ng amanu.
Iniang kagli ya ing asawa nang Simu
memita yang manuk a kule malutu
neng alang panyali ing depat na rugu
menako yang lasak ita pang manutu
Agad yang minuli king karelang bale
pebukal yang danum kayari neng pete
dapot iniang iti bubulbulan na ne
dekap de ring pulis uling ayaktu re
Ita palang manuk a kayang atupan
bandi ne ning meyor king karelang lugal
nung inia I Simu agad neng pekiduang
ban akilala ne ing ginawang mulang
Pablasang ing meyor mamakla-makla ya
inia ring masanting ila ring kapad na
at uling I Simu tiktak ya katsura
paten ne lasa king ibye ng parusa
Inaus neng meyor metung nang galame
saka ne pepakwa ing manuk a mete
“samalan mu ngana iti I derang me”,
“kaibat magbalik ka ustung melutu ne”
Kayapag ning manuk ketang lamisita
kang Simu atin lang bage inisplika
nung nanu ng gawan mu king manuk ngara
makanian mu naman gawan mi keka
Alimbawa ngara pemakli me pakpak
paklian mi la naman ding adwa mung gamat
ustung ding bitis na ring kekang piglapak
paglapakan mi la naman ding kekang puad
Dapot ustung ika ngana ning alkaldi
atin kang agawang ikami ali mi
keka ne ing manuk iuli me iti
para king abe mung memita kaniti
Minisip ya’y Simung masanting ng gawan
king ban ing parusa kayang akabyusan
ot kabira-bira gulping mipatiman
ketang aisip na king manuk a derang
Malale neng binwat at pidurut-durut
a gewa ra naman kaya retang tanud
at kaibat sigpang ne ing buldit ning manuk
saka ne sibsab at pinyipsip paldeut
Ela mipabulad ; mipamulala la
ing mayor pati na ring abe ng guwardiya
neng alang mebisang gawa king depat na
binye da ne’ing manuk; dinian de pang pera …..
© Vhelle V. Garcia
March 10, 2013
United Arab Emirates
bindisyunan yu pu
ing tinggap ming grasya
a durungutan mi
king kekeng lamesa
…
Sabandal’s Literaturang Kapampangan
Sabandal’s Literaturang Kapampangan
rimang pag-anak,
bersung pag-anak,
kantang anak,
bugtung,
pabula,
mapilan a talambie,
anekdota,
makuyad a pangadi (4-liner prayers),
gulis (drawings)
1 pop-up page,
1 kard ampong bokabularyu.
maligayang aldo,
salamat pu Guinu,
miras ne naman pu
ing aldo Duminggu,
…
salamat pu nandin
anaku kaswelu,
aganaka ku pu
ing turu nang ‘ma ku
….
