Macuyad a serie.
© Eric P. Dizon
Pemansagan ke pung “Sulat king palsintan”.

(Mumunang dake)
Nung icang pakibat

Nung icang pakibat careng cacung cutang,
careng cauatasan a cacung alalang,
ning pusung magmalun ketang pangasintang,
ica ing talindo ampang ning miglalang.

King dake ning bie cu mibusal king lungcut,
ing metung nang ucdu king caplas mibalut,
anti king paninap metung yang bangungut,
bangungut ning napun a miglacuan tacut.

Dapot pauli mu ining canacung bie,
king caplas at tacut bigla yang metibe,
busal ning palsimi mirinan yang cule,
ing nasang ligaya ya sanang milibe.

Ining papasiag cu kening cacung sulat,
sana damdaman mu ing lugud cung tapat,
nanu man ing calma ning kecang pakibat,
macasadia nacu nung atin pagsalbat.

Nung micacatutuan ing cacung pangarap,
bang ing pamagdusa ning pusung melaplap,
ning lipang a isip lilipo alapap,
ua, maningalma cu king cacung pigagap.

Nung sacali man king datang a panaun,
nung tanggapan me ing lugud cung daraun,
ica ing pakibat king caplas ning napun,
uling ligaya ca king pusung magmalun.

Pablasang dimdam cu king cacung sarili,
king isip at pusu ica ing mal dili,
manalig ca sinta ali cu tabili,
bang ing pusu mu yang cacu manatili.

Mananu na sanang ing Dios macapayan,
saupan nacu sa’ at dinan capanayan,
careng pangadi cung cacung anyauaran,
mangacu cu kecang ica mung luguran.

(Caduang dake )
Ica sa’ng Pakibat

Ica sa’ng pakibat careng cacung cutang,
a panalangin cu king Dios a miglalang,
a canacung sacsi king lugud cung duduang,
a keca payabut at layun yayampang.

Careng paninap cu ica ing mamampit,
king panimanman cu ica mung acakit,
icang king isip cu king balang pinandit,
at kening pusu cu at’yu ca dusuldit.

Neng magdilidili cu at migugunam,
panagimpan cu ing yacu sa’ng micalam,
makisabi king Dios a Guinu ta’ng malam,
camtan cu ing aslag aliua ing lulam.

Manalig ca sana king lugud cung tapat,
daptan cu ing sabla migit pa king sapat,
e cu mangainipan agyang pang malambat,
king nanu man maging ibye mung pakibat.

Nung king sadia cung bie meging cung mabule,
dapot keca icua cung meging matibe,
at nung nanu pa man ing datang calibe,
macasadia nacu datang man ing lumbe.

Nung ing kecang lugud cacu me pagcalub,
ding adua ta’ng pusu ila reng misucub,
king isip mu sana ya sa’ng kecang palub,
ing pusu mu e ke dinan sucal a lub.

Nung ing cacung lugud ya ing kecang lugud,
ding kecata’ng pusu ila reng mibuclud,
anggang mabibie cu ica sinta cabud,
ing cacung luguran king tibe at catbud.

Damdaman mu sana ing lugud cung tapat,
a papasiag cu king canacung susulat,
ica mu ing bucud a macapakibat,
nung ing cacung lugud yang carapatdapat.

(Catlung dake)
Ica nang Pakibat

Ica nang pakibat careng cacung cutang,
king tinggap cung sulat a kecang inampang,
dacal a salamat king Dios a miglalang,
at e ya pagsalbat ing cacu dinatang.

Maglapo yang tula ing canacung pusu,
mirinan yang sala keti sulip yatu,
layun pagtumaila king duyan yuyuyu
tutu cung mipala kening bie mayubu.

Nu’ cu man lumaue, nu’ cu man malikid,
ing sabla macule king cacung paligid,
ing sabla tiuase nu’ man magumasid,
uling ing cacung bie atin neng catayid.

Pangacu cu keca ing e ca magsisi,
ing Dios mayupaya ya ing cacung sacsi,
ing lugud cu keca e ya malumpaui,
ing kecang ligaya, ligaya te ngeni.

Manalig ca sana kening cacung sabian,
ica cabud sinta ing cacung luguran,
pacamalan daca ngeni capilan man,
sucdul cu king banua anggang camatayan.

Ding cacung salita palto co king dapat,
at pakit cu keca ing lugud cung tapat,
ding pusu ta’ng adua a layun pilapat,
deni mirame la king tula’t pagsalbat.

Ining ligaya cu keca cu paramdam,
bang aramdaman mu ing lugud cung malam,
uling ing pusu mu ya ing cacung calam,
kening bie mayubu a cacu miparam.

Inya… sintang irang, dacal a salamat,
king kecang inampang a tinggap kung sulat,
cambe ning miglalang sasabian cung tapat,
careng cacung cutang, Ica nang Pakibat.

(Capat a dake)
Ica ing Pakibat

Peninapan daca ngening ganingaldo,
bigla cung mipacde agad cung tinicdo,
mine cu king auang at layun tinando,
catmu yang ligaya ing bayu cung aldo.

Binang anting tutu ing cacung paninap,
a panagimpan cu king cacung pangarap,
at paninasan cu king cacung pigagap,
ica ampo yacu miyabe nang ganap.

Neng pagumasdan ke ing kecang larauan,
ing pakiramdam cu anti cung duduyan,
pablasang balu cu king cacung isipan,
ngeni ing pusu mu balu cu ne laman.

Ngeni ing cacung bie misna yang kikinang,
maningning ing sabla a cacu daratang,
pauli mu sinta king lugud mung dinuang,
a peramdam cacu at layun inampang.

Tandanan mu sana anggang atin cung bie,
anggang ing daya cu umeng sasagese,
pacamalan daca at luguran tune,
at pakit cu keca ing lugud dalise.

Baluan mu sa’ sinta icang sabla cacu,
pablasang ing bie mu ya naman ing bie cu,
at ding adua ta’ng bie ngeni metung la mu,
ibat king samula angga na king sepu.

Catimias na ning bie a cacu miparam,
tutu yang macule, tutu yang micalam,
ing bie pangaldoldo milalung macagiam,
uling ing lugud mu cacu me peramdam.

Careng cauatasan a cacung sinulat,
mipaltutu nala’t mirinan nong sampat,
ding ngan cacung cutang keca la menibat,
at ing ligaya cu… Ica ing Pakibat.

(Calimang dake)
Ica mung Pakibat

Milabas ne naman iting patingapun,
ing aslag ning aldo migcusa neng memun,
ing panagimpan cu calupa ning napun,
miyakit ta na sa’ king dit nang panaun.

E maging sumbagal nung malaut cu man,
uling king isip cu malapit naca man,
at king cacung pusu ica mu ing laman,
ica ing aslag ning cacung panimanman.

Agyang pang aldoldo pane cung magdili,
dapot masaya cu king canacung bili,
pablasang balu na ning cacung sarili,
ing canacung pusu yang kecang pinili.

Ing panamdaman cu king bie pangaldoldo,
ing cacung pagasa yang pane magbabo,
uling ing nasa cu keca cu ngan palto,
ing tune cung lugud ya ing mangibabo.

Pauli mu sinta ining canacung bie,
tutu yang micalma kinatmu yang cule,
agyang malaut pa iting pamaglacbe,
yacung carame mu king tula at lumbe.

Neng misan daratang e cu mipatudtud,
ining cacung diua mimisip nya cabud,
at ing isipan na ring kecata’ng lugud,
arap na ning altar carin la mibuclud.

Kening cabilian cu at’yu king malaut,
pacamal cung sinta keca cu payabut,
ing anyauaran cung kecang paintulut,
ding kecata’ng pusu ilang miculaput.

King datang ing aldo daptan cu ing sucat,
siclod king arap mu mitalanan gamat,
at sabian cu keca ing lugud cung tapat,
careng pangarap cu… Ica mung Pakibat.

(Canam a dake)
Icata’ng Pakibat

Icata’ na sana ing maging pakibat,
careng cauatasan a cacung susulat,
nung nu’ ing tema na misna ya king sampat,
uling papasiag na ing lugud cung tapat.

Balang cauatasan a cacung alalang,
king datang ing aldo keca co iyampang,
carin akit mu ngan cacung sintang irang,
nung ninung sacsi cu ya pin ing miglalang.

Uling papupus ne ing kecaming misiun,
dacal a pinandit e cu mipaindatun,
uling malapit na ing pamicatagun,
ing akit da naca king dit nang panaun.

Ala cung aliuang pane panagimpan,
nung e datang na sa’ ing cacung panayan,
itang at’yu nacu king kecang arapan,
at ding kecang gamat ilang cacung talnan.

King miyakit cata saganan me ing bie,
uling ing cacung bie keca ke mu ibye,
at ing cacung pusu keca irake ke,
at king kecang salu ken ne mu cumabie.

Tandanan mu sinta ining cacung pusu,
ya ing casuglung na naman ning pusu mu,
keni mitatac ya ing mung kecang lagyu,
at e ne mabura anggang at’yu yatu.

Paramdam cu keca anggang atin cung bie,
ing pamipaltutung lugud a dalise,
at ining lugud cu e na acuang mate,
agyang miras nacu king casumangid bie.

Yan ing cacung lugud a tune at tapat,
a dimdam cu keca ibat pa king ibat,
inya naman sinta daptan cu ing dapat,
uling careng bie ta’…. Icata’ng Pakibat.

(Capitung dake)
Yacu nang Pakibat

Yacu nang pakibat careng kecang cutang,
a ginamit ning Dios a Guinung Miglalang,
at king aldo na ning cacung pamanyatang,
ume yang maslag ing bie mu sintang irang.

King datang ing aldo icata’ng miyakit,
ala cung sayangan a dit man pinandit,
ining cacung lugud paramdam cu’t pakit,
at maging lunas cu king kecang pasakit.

King pamiyakit ta’ muna cung tuparan,
ing cacung pangacung ica mung luguran,
at ding kecang gamat cacu lang anyaran,
uling ica na ing cacung capalaran.

King arap ning Guinu icata’ng siclaud,
at ding aduang singsing a kecata’ng sulud,
ilang maging tanda ning pamicalugud,
ding kecata’ng pusu carin la mibuclud.

Lumaban ca sinta e ca sa’ paisaul,
king dintang a tagcu a keca kinaul,
ing bayat king salu alun daragulgul,
ning maulagang bie king pisac mesucul.

Manalig ca sinta e ra ca paburen,
king pangarate mu layun da cang banten,
at ing catauan mu ya ing cacung sesen,
anggang migising ca king aplus ning Birjen.

Pacatandanan mu maging ing cacung bie,
liuas na ning bie mu keca idaun ke,
nung ini yang lunas at maging calibe,
ini yang daptan cu ica sa’ng cumabie.

Macanian cu sinta a linugud tapat,
inya ing gauan cu ing carapatdapat,
maski inaua cu acua na nang mampat,
uling king kecang bie…. Yacu nang Pakibat.

(Caualung dake)
Ing pamag-uacas

(Sulat king Palsintan)
Yacu ing Pakibat

Dening cauatasan a cacung sinulat,
ilang maging tanda ning lugud cung tapat,
patye ring mata mu ilang mimulagat,
careng kecang cutang lunto ing pakibat.

King pamangising mu saganan me ing bie,
ing bie misna sampat at tutung macule,
uli ning lugud a kecata’ng pirake,
a penamdaman ta’ng tune at dalise.

Ing metung pang tanda ning kecata’ng lugud,
king palsingsingan mu atin cang susulud,
nung nu’ ring lagyu ta’ ila ring mibuclud,
careng aduang pusung tune micalugud.

Maligaya nacu king cacung pinili,
itang idaun ke ing cacung sarili,
at yang maging lunas at maging alili,
bang keti king sulip icang manatili.

Pablasang balu cu ing e cu cumabie,
nung ica ing muna a cacu miuale,
inya ing pusu cu keca iyampang ke,
liuas ning pusu mung king dulum mirate.

Bacalan cu na mu king cacung pamamun,
ing sablang ligayang binye ning panaun,
ing lugud mung tune a cacu dinaun,
anggang ume nacu king canacung aun.

Tandanan mu sana o’ mal cung capisi,
ing lugud cu keca e dit man mapisi,
at kening gauan cung alang pamagsisi,
uling ing Guinung Dios ya ing cacung sacsi.

Bayu cu sa’ mamun kening cacung sulat,
ing panabilin cu pane cang mimingat,
anti ning geua cung keca pamaningat,
uling king pusu mu…. Yacu ing Pakibat.

          <<<<<<<<<>>>>>>>>>