© Irvin Harvey Rivera
Siuala Ning Maliwalu/Anac Ning Baculud
Malugud ya’ing Guinu karing sablang tawu
Gewa nong tuknangan king lele nang Tronu
Dinen nong santungan anti mong Palasyu
Lugud na karela–Lugud a masolu.
Dininan nong kulul ding balang lelangan
Tanaman at Bunduk gewa nong aluntyan
Ding sapa at ilug sepakan nong asan,
Balang lelangan na binie nang pibandyan.
Ding batwin king banwa pyandap-andap nala
Bang ing sala ning bie maguing makule ya
Ing aslag ning aldo, papali’t dirimla,
Ing kabaldugan na—Ing yatu mabye ya.
Ing Naturalesa king yatu misapwak
Ing D’yos pigkalam na king mayap nang balak
Lon mo ring Tanaman ampo ring Bulaklak,
King T’yup na ning Angin anti lang teterak.
Lon mo ta ring Asan king ilug mabibie
King dagus ning danum mepatad la lumbe
Ninung e magnasa king lagu nang tagle
Ning Naturalesang pigkalam na’t binye.
King kekaba na ning magbayung panawun
At ing sablang bague mamit nang malaun
Ding lelangan ning Dios dit’ na mung panawun
Nung e ra pa sesen muli mu king gabun.
Ding mangaragul a tanaman king bunduk
Pengutud do ngan ding awsan dang makasnuk
Ding sapa at ilug kabud no mebuluk
Ding pibandyan ning D’yos king dusa la mipuk.
Ding batwin at tala kabud la misimpan
Dalumdum ning bengi ya nang amamatan
Ing aslag ning aldo pane n’yang albugan
Malapit nang datang itang kawakasan.
Dapot, ika….Tawu! Mamit na ing oras,
Gawa kang paralan, ngeni na’t maliswas
Ing Naturalesa—pamana ning bukas,
Pigkalam ning Guinu, binye nang malwalas.
Ding balang lelangan dapat ta lang sesen
Iti pigkalam na at e tamu pabren
Datang ing panawun e ta pagmalumben,
Lelangan ning Guinu, e ta no akit den!