Makuyad A Poesya
© Irvin Harvey E. Rivera
Siuala Ning Maliwalu/Anac Ning Baculud
August 28, 2019
Batwin kang maningning king busal ning dulum
Lalam da ring biga, e bisang mak’yagum
Batis kang malabug magsilbing paranum
King mau kung pusung e ku na akumkum
Banwa ka’t gabun kung malawut milagum
Lugud ku, lugud mu, e misasanmetung.
Matuling kang biga a mumuling lulam
Busal alang patna king aldo ning amyam
Suksuk kang tutusuk atmu king kataram
King pagsuyu’t sintang babalang mamalam
Grasya kang mebaldug a e ra pigkalam
Ning D’yos Mayupaya—-Guiguinwan kung malam.
Ambun kang pinisik king kanakung pisngi
A lebul ning angin a kabud melangi
Aldo kang tinando a merimla pali
A kinawul kakung memun nang maragli
Paninap kang putut a buri kung buri—-
At balak isundu ‘gyang muli kung sawi.
Alikabuk ka king ka’kung pilubluban
Nung nu’ sumbagal king ka’kung panimanman
Batu kang mabayat a ka’kung daralan—–
Pibekutbekut kung alang paintungulan
Balas kang masalat king dalampasigan
Babye mung lingapngap, anta yu? Misimpan?
Rosa kang masuksuk king metung a pasu
Masakit agtalan king tagle mung lagu
King kanakung baul sisinup kang Guintu,
Pakamalang perlas, miguit pa king tansu
Dalaga kang Mutyang e ku apatangu
At e ku abandi ‘gyang magparalumpu.