(HIGH SCHOOL SWEETHEART)
© Irvin Harvey E. Rivera
Siuala Ning Maliwalu/Anac Ning Baculud
August 18, 2016

Malikid ka ta’ king panaung milabas
Kabang baltangan te paratang a bukas
Uling sablang bage ume mang kumupas
Mamun at maglakwan a mayap a bakas.

Alang katumbalas ing maglapong tula
At ing bagebage pisulwan ta’ng adwa
Ligaya ka ka’ku keta pang samula
Ikang babye sunis king kanakung kudta.

Labing S’yam banwang alang patnang lugud
Masikan mang uran king albug e minyud
Pablasang pengaku nanu man ing tumud
Ika mu at ika, at ika mu kabud.

Iskwelang Potreru karin megumpisa
Sinibul ing lugud at ing pamalsinta
3rd year ka, 4th year ku, siping ta’ng Iskwela
Ninung makasabi—-meguing paintungul ta?

Kanitang minuna e ta’ man sikasu
At e ta’ ukulang mikaburi tamu
Pablasang balu ku at aliwa y’aku,
Ing klasing Lalaki a sibuburyan mu.

Mitatagun katang miyagnan neng mumuli
Kabuklat na ning “Gate” neng ugtung mapali
Uli na yata king matimyas mung ayli
Ing makyagnan keka asna kung kaburi.

Istung ka’ku ra’ka pane pakibage
Ding ka’kung kakuyug a alang marine
Pablasa sinta ku nung pakasuryan me
Ika ampo y’aku—bage ka ta’ng bage.

Milabas ing sabla, panaun migbayu
Mipalsinta ka’ ta,, pisulwan ing yumu
Panaun at oras binye na ning Guinu
Piyabe naka ta’, miyasawa tamu.

At mangga man ngening apat tana Anak
Ing pamiyabe ta’ e meguing masalpak
Sasaganan taya ing legwan ning abak
Kayabe ring Apat king tula’t sagakgak.

Kanyan ku menwala tuneng pamalsinta
Megumpisa ketang magaral kata
Manggang kapupusan ka’ku idalit ya
Ing Malagung Kalma ning pamiyabe ta.

SiualaNingMaliwalu #AnacNingBaculud