© ORLY MANALO DIZON
Temang Metapora; Ortografiang: ca, ke, ki, co, cu; Sucad: labing ualu (6/6/6); Linya: anam (6); Parapu: anam (6); Nov 20, 2015.
1
ING LUGUD ya itang,
babie sicanan lub king taung malumbe
Iya ing cacambil,
matibe sasagca king unus na ning bie;
Iya naman itang,
babie alananggang lingap at patnube
Iti mayayakit,
caring macabuclat palad anggang tacde;
E ya’ti manaya,
bage cayablasan o caya payalbe
Macanian ya itang,
tune magmasabal king lugud mipande.
2
ING LUGUD ning Inda,
iyang mamilatan caring keang anac
Iya itang pali,
a babie balunbong king dimla ning abac;
Iya itang laue,
tratu pante pante ‘ting pusung busilac
Iti mipupunla,
ketang pangatau king isip tatatac;
Uling yang sucdanan,
a peca-guyabnan lisyan ing marauac
Macanian ing lugud,
a alang papakit ugaling masalpac.
3
ING LUGUD king Sabi,
ning metung a lugal labuad Kapampangan
Iya ing pundasyun,
kecang keguisingan a dapat lingapan;
At iya mu naman,
caretang labi mu gagcas manibatan
E iti magmali,
pane ing lagablab king pami-atbanan;
Uli yang ginising,
king pibale-bale anting pimamanan
Ya pin tune lugud,
e maliaring maco agiang capilan man.
4
ING LUGUD king Bage,
anting calicasan ausan tang panaun
Iya itang angin,
malamius nang sunis agus nitang danum;
Anti uaring nota,
campe na’t lindayug ning masayang alun
At ketang marangle,
banayad dadampi ning marimlang ambun;
A careng tanaman,
ampo ketang dicut a magyungyung bulung
Deti ‘lang simbulu,
niting calicasan magagpa king gabun.
5
LUGUD a dadake,
caring parang tau metung yang ugali
Iya ing alino,
nitang pangtau e dapat tabili;
At iya naman ‘tang,
panugaling mayap catutubung bandi
Babie alimbaua,
acakit ding mata ugaling mabinti;
A dapat apusan,
nitang taung atin dacal a salapi
Ban padama iti,
mipmung catapatan alang pacunguari.
6
ING LUGUD a pacsa,
babo mesambitla cacung dinen diua
Ila ding mapilan,
bage importanti dapat ipauaga;
A ketang aldoldo,
ning kecatamung bie aduan king Dios Ibpa
Ibasbas Na sa ing,
metung a masampat ugaling maula;
Ban ing yatung iti,
laganap itang bie a mipmu king saya
King bie manatili,
itang catimauan milaco inggang mua.
DIZLAG FARM & RESORT, Jan. 2, 2023.