© ORLY MANALO DIZON
sucad: 8/8/8; ortograpiang: C-K; March 9, 2014.
1
DISIPLINA nanu ya mo,
itang keca nang epectu, keni nang bie’t pangatau?
Metung ya uaring sucdanan,
aspetu ning pamibiebie, macapusan king pago mu?;
Iti uari ya’ng timbangan,
pagbasian kecang kimut, at panasbuc mung amanu?
Iya itang sasalamin,
acakit ning paglalaue, ‘ting calidad a mayubu.
2
DISIPLINA nang ulaga,
nanung keca tuturu na, at nang galal keca bie na?
Metung ya mo uaring dalan,
malinis o sari dinat, a kecang bie nu na dala?
Kecang tune panugali,
e mu iti asalicut, mayayakit caring mata
Cambe ding matas pamisip,
da ding kecang comunidad, itang usga keca bie da.
3
Ngeni na mo ing cutang cu,
nu ca uari maca’grupu, keca ya sang pakibatan?
Nocarin ca macayungyung,
nung sanga cang sacdal labung, king sosiodad macabilang?
Nanu abe cayangcas ca,
caring tupang malilile, angga ngeni ‘lang silungan?
Deting maulagang cutang,
ing keca co babalate, marapat kecang atbanan.
4
E balang bage king yatu,
pane ‘tin catulid presyu, lalung-lalu ning sarili
Cailangan me ing prinsipyu,
at ilaban ya’ting ustu, e ya tatabili iti;
E da calupa ‘giang nanu,
ding criminal a serbebu, ing diablo ya’ng minie suerti
Inia detang caladua da,
at carelang pangatau, king deuacan la salangi.
5
Caniaman sanang tangalan,
ding kecatang manungculan, mica-ugali lang mayap
Mecad ica ampo acu,
cayabe ding sablang tau, manerac tang sacdal gilas;
Asilauan ya pang maslag,
itang sulu ning timau, tune batas ya’ng pairal
Macanian cu mung pagdugan,
datang mu rin itang oras, bayu ing bie cu mapatad.
6
DISIPLINA yang magsale,
caretang nasa’t pagnasan, at king tau mamugaran
Uling ya itang calasag,
ya ing pecakilanlan na, clasing tau ning balayan;
Uling ding tau ‘lang migut,
sati na nitang panyulung, malambat nang paninapan
Cambe basbas ning Dios Ibpa,
ampo ning masaplalang bie, agnan-agnan tamung aduan.
7
DISIPLINA cailangan ya,
king adoldo talamitan, o king nanu man ocasyun
Detang’gang palatuntunan,
king publicu maca-atang, king batas la maca-ayun;
Deti tukian lang matapat,
ibusal la caring pusu, king nanu pa man panaun
Uling ilang macacayap,
munie sigla at sicanan, king salunan tang condisyun.
8
Oyan ken ya mabitasa,
icasulung na ning bansa, magpursigi ban minauâ
Gunyat tamu’t magmasabal,
at misanmetung ta ngan sa, king ban dasnan detang nasâ;
Gamitan ta lang masusi,
pilinan lang sacdal ingat, king tungculan maninasâ
Mangibabo la detang map,
a maniuad catungculan, atin lugud king Dios Ibpâ.
DIZLAG FARM &RESORT, Dec. 28, 2022