NGENING KILBIT MUKU

ing kalingwan daka, iyang e ku agyu
uling ing lugud ku, keka e magbayu
nung ginulut ku man at keka dinayu
patawaran mu ku, king sikban kung bisyu.

masakit pin bina, mamangka kang ilug
nung ing kekang nasa, kabud magparulug
king kekang sanglaran, e ka sa’ paybaldug
ban e ka malumud, keng sapang malabug.

king kapagnasan kung mika-inspirasyun
pinili ku itang simpli mu’t manayun
dapot uling malawut ku destinasyun
e mu pala yakung, keyang karelasyun.

anya ing sumulat keka e agawa
uling melasun ne ing aba kung diwa
pati ing pusu ku, isip at kaladwa
anti lang kandilang pupus at magluwa.

umpisa kanita ikwa nang metamle
niting kakung plumang kebit ku ke lele
melangi ya tinta meputla ya kule
anya ding sunis ku, mengari lang sale.

ngening kilbit mu ku king wanan kung pago
pangaku ku kekang e na ku sulagpo
pagpilitan ku lang miyaslagan aldo
detang gintung butil a kekang talindo.

ala kung sisisian alang palsalanan
akung mikaburi king kakung delanan
king kawul at lugud a kakung pantunan
sera naka pasbul ning kakung isipan.

dapot ing sinta ku, keka e kumupas
oh amanung menan, ala kang kayabas
king dase ning dagat, pangwa da kang perlas
saka ko itungi, at keka pakwintas.

(© WakaOjie Mangalindan Pena )
* 18 Desiembre 2019 *

This entry was posted in Poesia, Poeta WakaOjie M. Pena. Bookmark the permalink.

Leave a Reply

Your email address will not be published. Required fields are marked *