Ninu namo kekatamu , ing é mika kaluguran?
manibat king kayintangan , angga naking keragulan,
masaya tà lang kayabe , mangga man king kamulangan,
é murin pin lubus balû , nung masanting kapuntalan.

Dakal kareng kaluguran, abalu mo pangatau ,
detang taung desididu , ampong taung mapanloku,
atin murin mayayakit , maki mayap a prinsipyu,
anggiaman mas makapa’la, reng sangkap naning impyernu.

Atin murin magmasabal , detang mayap kaluguran,
‘giang nanu man problema , é naka painggulutan,
turu at turu ne’ing dalan , banta balu mung lampasan,
é naka agyung itulak , at isubung king kutkutan.

Ngening mika isip tana , mabiasa ta sang mamili,
nung ninu man ing abayan , é paburen mikawani,
miras man ketang sukdulan , ‘yang é naka itabili,
sibat ya man dugpa kaya , pilmi nepang apamakli.

Dakal pin a káluguran , balu damu nung atin ka,
pero potang ala nalang , amulestia rugu keka,
nunka !..karin misip naka , oba’t kenyanan da naka?
kasi ala nong sipsipan , inya eche puera naka.

Atin murin aliwa pa , potang ilang mangailangan,
kabud dana aisipan , ume raka pin lapitan,
wa man alabas munala , é mula pekarinayan,
sana balu dang ganakan , king misan mulang asopan.

Oyni ing maliliyari , potang ika na ing lipit ,
inyang misan menutang la , memakisabi lang pilit,
kaibat danang mekinabang , bitasang é no mekikit,
ngening ika ing manyingil , keka lapa migiligit.

Anting é ko tutorusan , dakal milyaring makanyan,
itang pamikaluguran , mika atin kasagkulan,
inya nung tapat kang tau , bayaran mo at bayaran,
uling ding abye na keka , é no pemulut king dalan.

Sintosis man memayad ka , anggiang mematubu kapa,
ita mung asopa’naka , ketang kailangan mula,
é ya mig adwang lub keka , beguta’ne ing bulsa na,
atin kapa murin utang a lub , miraus ka nune kaya.

Ketang sumangid pang banda , atin pa kareng mapilan,
aistorya mumo ing bie mu , uling ya ing pigtiwalan,
kagulut mu’t kagulut pa , king aliwa miras na ngan,
inya aral yamo keka , é ne dapat pang abaran.

Kareng memye a sakit lub , tanggapan yang maki aral,
e no dapat papatulan , palisan lang anting sukal,
e muno mo lalapitan , e naka rin makipagkal,
ustu na pamu ing misan , ban ing lub mu e sumukal.

Pero maski makanyan man , ing turing king káluguran,
nung nu mula kakilala , anti mo mong kayagpanan,
é malaut …é malapit , yanamu ing dapat gawan,
ban angga naking keluatan , abe mula kapilanman ….

Ing kekong talasuyu;
Patria Bondoc David
(Tsokolating Lagu-lagu)
ning Manlapig Capas Tarlac
29 ning Nov. 2017

Aluguran daka , e ku balung sabyan,
ing pamiikit ta , keni mu king “online”,
e naka mebura, kening kaisipan,
king aldoldo namu, ika nang panayan.

Nanu kayang sangkan, kabud ku masaya,
kada kumentu mu, kakabye ku diwa,
kasi “de kahon”la , deng kekang salita,
balang sambitlan mu , lubus kung manwala.

Keka ku milsinta , king e mu kabaluan,
iting panamdaman , keka… e ku sabyan,
keni nang isip ku, danaka luguran,
ngeni … pota…bukas …angga ya kapilan?

Dapot kukutang ku , neng misan pa murin,
e kumo pin kaya , lulugud king angin?,
pilit kung isipan, ume ku neng pimpin,
ing lugud kung ini , salikut ku nya pin!

King balu ku naman , alang kapuntalan,
e ya pin malyari , maski kapilanman!

© Patria Bondoc David
(Tsokolating Lagu lagu)
13 Feb 2019