( Great Women's Day )1.
Ngening atyu kening kuartu, makalukluk unyat-unyat
e ku balu nanung sangkan, ot gagagad la ring gamat
kararagling kinwa’ing pluma at ing kwadernu binuklat
ing linub king kakung utak, itang bunduk ning Arayat.
2.
Piling-piling kung mimisip, kukutnan ing sarili ku
obat bunduk ning Arayat, yang linub kening buntu’ku
anggang kakung pegumasdan, alkus naning peka-sepu
anti ya pin makakera, itang magpaynawang lndu.
3.
Kanita ku aganaka, aldo ding ebang dakila
a-otsu, bulan ning Marsu, ita ing petsang mitakda
gyang ing moda miyaliwa, susulud nang Maria Clara
bakas ning leguan minana, e malakuan king pustura.
4.
Santa ya ing kasimpara. anting reyna ning sagala
e mo akit ding intud na, uliing palda asnang kaba
nung imbut mung mamanikan, karing dalaga kanita
bayu mituklu king eran, dumalan pa mung arana.
5.
Ngeni meging aliwa man, ing istorya’t kasaysayan
ding babaing makilaban king karelang karapatan
e man lubusan kilala, bayani kong tatalangan
king dusa dang daralanan, anak,e do peingulutan.
6.
Dacal ku man darandaman, karing mutyang kayanakan
impluensya ding dayuwan, ing karelang pakyapusan
anya naman ing balita karing manga-lapasatangan
pilan lamu detang ebang.. akamtan ing katalawran.
7.
Pakiyabas kemu naman kareng manuk a gayindu
itang lingap na at lugud karing sisi na akit mu
a gawan ing karampatan laban kareng mapanyilu
at marap yang alang takut, busna ing bie na mabugtu.
8.
Sana kekatang gunaman, ing aldo ding ebang malam
kekata lang ikarangal angyang e la matenakan
e ya rin sa’ kakaligwan ing lndung Keyang pibatan
angyang king krus meyabas Ya, ing lndu Na, e ne likwan.
* 07 Marsu 2015 *(© WakaOjie Mangalindan Pena)