Bisa ya pa’y apu

Misan, meyoldap ya ing pamasadang dyip
a biyahing Malolos, Calumpit, Apalit
pablasang manuldul at medyu lilintic
caring checkpoint ala nang magbante pulis

Ding manasdap yan ing pagmalasadian da
ban mipanusigan dapat dang matsura;
caras king Sulipan “ilele me” ngana
ning metung, king drayber, a titucanan na

Panupaya yu pu ngara ring holdaper
caring pasaherus a casake ra ren
ibye yu la sa’ ring pera’t gamit yu ken
alang manasakit nga’ning peca-lider

Itang dalagitang, atyu dane gulut
ning drayber, mangalgal ya keng sobrang tacut;
abe ne’y apu nang panatag mu lucluc,
a mimidad manga otsenta’y dos anyus

Ding menasdap e la pa murin tinacas
bistaman menicua nong pera’t alahas;
at ngana pa niting lider ding menoldap:
“ding anggang lalaki itali yo gamat!”

At deting babai i-‘rape’ ta la ngan den
nganang mengmanu ning carelang lider
bayu ta la’y bulus ding ninu man caren
pamusbusan ta ya pa dugang ing saken

Gulpi yang menangis itang dalagita
at migmakalunus ketang pamuntuc da;
aku nang i-‘rape’ yu, ing panigapu na
e yu ne pakiabe i apu cu ngana.

Mimwa ya ing matwa saka ne sebyanan
ing apu nang kindut na king tagiliran
patugut ca ngana, e mu wari dimdam
itamung babai, i-‘rape’ daca ta ngan!!!!

Vhelle V. Garcia
Abu Dhabi, U.A.E.

This entry was posted in Komidya, PL Vhelle Garcia, Poesia. Bookmark the permalink.

Leave a Reply

Your email address will not be published. Required fields are marked *