Kapampangan Library

@ ING TIMAN NING BUKAS @
(Linikas king Lirikung Walang Papalit)

Parati o pane ku nyamung paintunan
Kabuklat ning abak anggang kabukasan
Balang magpiyak ku iya ing tagimpan
Dapot kapilan na ku keya ampitan.

Parati na kumung e mipapaindatun
Kakaisip keya kilub patingapun
Ing panako suglap neng mikakatagun
Maligaya naku angyang e ku mapun.

Neng asasambit keyng lagyu nang e sarya
Mipapatiman ku at e maniwala
Sabian da man kakung metung kung mulala
Uling angga ngeni, iyang kabud sinta.

Iyang meging sangkan inya linugud ku
Iya ing mibuklat king pasbul ning kuartu
Ning pusung migbalut king takut mabigu
Inya migising ku king pangasubsub ku

Ing pusu ku ngeni, maybug neng gulasyo
At king awang magkang, ume neng sumiro.
Nung pasibayu yang, sumilip ing aldo
E kuna pabustan, lumbug nya alino.

Sana mipasno ne keng siguk at kaplas
Ining abang pusung kayarle ning pasas
King delarayan nang late ning milabas
Aligan ne ngeni, ing timan ning bukas,

          * 03 Oktubre 2020 *

(© WakaOjie Mangalindan Pena)

. . .BAN E KA MANABU. . .
*
Kapalaran ning tau, keti babo yatu
asne kapamiru, ‘ne pang kapanuksu
angyang mikelangan, e’ pa-garabyadu
Iakwas na karetang, atyu king kumbentu
dakal mag-milagru, keng kilub ning templu.
**
Ing gewa rang batas, pabor ya karela
ban alang mipuestu, king bangkung buri ra
lalut metung lamu, tagimpan basura
anya reng kokontra, ala lang pangara
uling pekapun re, ing atyu kama-ra.

Misan iyang malam, sasala ya naman
timo karing tanak, nampu’nang tatang Juan
kipkup no’t dinenan, masanting kabiayan
dapot ikwa re pang, peglubas a ‘malan
At peglibe kareng, kualta nang Uncle Sam.

Dapot nu ‘no’ keya, ring sukib a barak?
A pakapanpan king, pakpak da reng uwak
Mitambunan keyang, kuleng gintung burak
Itang mengatukal dang karning piglaklak
O’ justisya nang Juan, pang-ayup yang tagak?

Ikwa da nang metwa, rening nampu’nang Juan
e la bisang tikdo, lakwan ing luklukan
ala nong balak pang, lumwal king kanlungan
o tando keng awang, ban deng apag’masdan
Ing aldong managkat, king tawling apunan

Nya ing dapat gawan, e ka mamerwisyu
pairal ing batas, karing pengaku mu
keka lang luguran, ding para mung tau
ban e ka manabu bitis king impyernyu
e mu lalabagan, ing utus ning Guinu.

     * 27 Setyembre 2013 *

(© WakaOjie Mangalindan Pena )

Kudtang kesyap karas kang Jolibi
Agad yu nyang bili, Nung e ye buri..

     " S A B U N "

Buri ko sa’ng tulid, reng lilisya isip
Ban ku lang atusuk, daretsu reng kubit
At sana akit ko, ding tune manulip
Bayu ko paglako, bikwal reng kalawit.

Nanu yamo keya, ibie rang pigura?
Nung ing mamikudta, e re kapustura?
Purian de mo kaya, masanting nang obra?
O pantun deng sangkan, dikil keng sesura?

Ma’pang yaku namu, ing sabun lelang ku
angyang sasalikut, king maputlang sulu
uling sasagana, ing tula ‘pon tuksu
potang akakit kung, ati’nang mandilu.

Dakal asasalat, parting mangaselan
karing gamat, bitis, anggang talampakan
‘nya e ko abilang, deng kaku tinalan
lalu na karetang, malibub katawan.

Sikretung malalam, patye mabanglu ka
neng presyu mu e mal, pibuburian daka
anya mapalad ku, neng atyu i Maria
ramdam kung katmu ya, ing ligaya banwa.

Ing mung pagimputu, ning kakung kabilyan
potang lumambut ne, ing masias kung laman
Iubas kung kariktan, babie kapasnawan
uling Sabun yukung, lual-lungub neng misan.

Makanini ko sa’ng, labas king palad ku
retang mangalibing magkulung keng banyu
Iakwas na karetang makakumbo salu
antimo kang adan at ebang malagu.

© WakaOjie Mangalindan Pena*
( 20 Setiembre 2021 )