Paburitung Amanu neng Eric Dizon
Kalagu mu Atchi, kayaslag kang bulan
Sala kang patindag keng piping kabengian
Ing pusu mang pata ligmuk ning kabiguan
Pasasal ne tibuk ning limus mung timan.
Recent Comments
Timan
Posted in Anac Ning Arenas, Kataya
Leave a comment
E Ku Pa Kelingwan
E KU PA KELINGWANEku pa kelinguan inyang malati ku
Malati ka naman ikang kekyalung ku
Maligaya ku bie keti babo yatu
Uling balang saglit ati ka siping ku.
Lalam balag opu tibis na nitang luwal
Siping ning talaga lele ning talaksan
Babo ning garosa ‘tin katang piyalungan
Perang kalapanti daratuk tong bikan
Itang bulung sagin kingwa kung pengile*
Pilit kung lalalan gagawan keng dase
Kabang ika naman pilit kang lalawe
Uling magtinda kang miyaliwang gule
Mamialungan kata piku ampong sintak
Ninu mang masambut parusan teng terak
Oneng yaku rugu mealan kung palad
Kabang teterak ku ika ing papakpak
Kaibat menagkat kang magbale-balayan
Kanwari ikatang Ima ampong Tatang
Ing kekatang anak munika yang basan
Kabang pagkanta ke titerak mu ne man
Dintang ing kabengian ikua tang meiglip
E ku pa mumuli, mapun na penandit
I Ma ampo’y Tatang pentun da kung pilit
Bala nang Apu ku e ra na ku akit.
*pengile – pengising maimpis
---ooOoo---
Posted in () Pang-Anak, Anac Ning Arenas, Kanta
Leave a comment
Kanta Para Kang Indu
Kanta Kang Indu
Kuwentu yang pakanta keng istoria mung metung a penganak manibatan keng panga-sapwak mu keti king masala, at ing lugud nang Indung mig-sakripisiung pagal, puyat at kasakitan, ban kabang daragul ka e ka lunto wasang-wasang?
Agya rugung mamangan ya’y Indu, bigla yang talakad istung ikit na kang magtatamual dinat.
Alang kayangganan ing lugud nang Indu
keka o penganak supling a tinubu
anti ka mong sibul a malati tulu
malino yang danum manyaman a tutu.
Keka o penganak sukat mung ganakan
kabuktut na ka pa tatangka ra na ngan
itang sablang bague a kekang kailangan
ban king kabait mu eka wasang-wasang.
Atiu ka pa kilub atyan nang Indu mu
dakal nang pasakit ing kaya binye mu
menganib yang mate qng pangabait mu
pauli ning sakit e mu mamagkanu
Anak kang pasusuan e ditak a puyat
ing pibabatan na uli ning kekang kiak
anggang mamangan ya bigla yang talakakd
lalu’t akakit nang tatamual kang dinat
Potang masakit ka saka ka mo kikiak
ninu ing mumuna a keka lilingap
ninu ing tatangis nung e ka kakayap
bukud nang Indu mo tatangis magsalbat
Di Ibpa’t Indu mo tutung pikabaluan
ing tune rang marka yang kapibabatan
mayumung lugud da mayumung tagimpan
dapot ing ablas mu mapait nung misan
Anyang malati ku kenu ku sinusu
at kenu la takde ding kinandung kaku
ninu ing minuma mingatbang pisngi ku
ala nang aliwa nung e mu’y Indu ku
Potang matua nakang maina na katawan
karening takde ku ika ing kandungan
ba kung makayablas keng kekang depatan
Indung mal kanako keti qng sikluban
Datang ing pananun at nung mirate ka
aku ing magbante king siping mung kama
anggiang nanu pa ita aku ing mibata
anggang king kutkutan Indu yatad da ka.
— ooOoo —
Posted in () Pang-Anak, Anac Ning Arenas, Kanta
Leave a comment
Dalundum Ning Bengi
Dalundum Ning Bengi
Matuang kantang Kapampangan abalu nang Sildu keng Tininti Binu ketang malati ya pang tutuking dudulung keng marangle neng bandang gatpanapun.
Potang salingku na la keng gasgas manibat keng dalan palub keng marangle, mag-umpisa neng magkantang patumaila y Apung Binu, kabang makasake ya keng gulut nang Kalakian o kaya kang Baintau, at makapagulyut ya y Gareta.
Y Sildu naman kanita, makasake ya keng gulut nang Matsora, tuki-tuki keng kagulutan nang Gareta, kasabe ri Gaindu at Dimulagang makatali keng kabulditan nang Gareta.
Keng kerakalan neng besis dindam Sildu ing kanta nang Apung Binu, mitanam ya keng pusu na at panalala angga man ngening ala ne Apung Binu, at e ne makauli munaman y Sildu keng marangle keyang keragulan.
Dalundum ning bengi
Inyang akit daka
Ala yu ing bulan
Banua matuling ya
Detang sablang batuin
Pakasalikut la
Ing sala ning kildap
Yang meging sulu ta
Metung ya mung dutung
Masanga’t malabung
Ing selilungan ta
Kekata papayung
Sanga nang melangi
Dinundung king gabun
Nung era ka sinta
Mamin lang matampung
Ngeni ku abalu
Ing pait ning sinta
Keng lugud mu kakung
Ing pali merimla
Makananu kasi
Pepamisan mu na
King apalsintan mung
Bayung kakilala
— ooOoo —
Posted in Anac Ning Arenas, Kanta
Leave a comment
Ing Dalandan
Matua yang kantang Kapampangan madalas kakanta nang Tininti Binu kabang padulung ya keng marangle sake nang Kalakian, at katuki ne’y Matsorang sake ne’y Sildu.
Ating metung a dalandan
tinubu ya lele dalan
kabalyeru yang dinalan
pagnasan neng buring kuanan.
Sungkitan ne e ne abut
basibasan ne e tumud
kinua ne king isip at lub
ala yu king labi’t asbuk.
Dinan ke pang kabaldugan
itang mesabing dalandan
lalaking e ra palsintan
babaing e ra pagloloan.
— ooOoo —
Posted in Anac Ning Arenas, Kanta
Leave a comment
Anak a Masipag
Kantang pang-anak a abalu nang ikanta at tenam king pusu at kaisipan Anak Arenas, karing mumunang aduang gradu keng Arenas Elementary School, lalam dang Ma’m Adelina Cao, at Ma’m Salud Lansang.
Ing kanta makapatungkul ya keng pangamulat ning kayanakan keng maranun nang responsibilidad ban sumaup kareng pengari, pablasa mekad ning kakaluluan, ban e mipaburen ing pamilya.
Aku ing anak
a babaing/lalaking masipag
agad migigising
kabuklat ning abak
manyaklu kung danum
maningat kung anak
magtinda kung gule
ebun ampong gatas.
Patitingapun ku
durulung marangle
manugak, sumakul
mamulut kung pale
pangaras ku bale
yaku pang manese
e ku anti kekang
masakit kasabe.
— ooOoo —
Posted in () Pang-Anak, Anac Ning Arenas, Kanta
Leave a comment
Y Tatang Ampo’y Ma
Kantang pang-anak a abalu nang ikanta at tenam king pusu at kaisipan Anak Arenas, karing mumunang aduang gradu keng Arenas Elementary School, lalam dang Ma’m Adelina Cao, at Ma’m Salud Lansang.
Ing kanta makabaldugan ya, at babie parangal kareng kekatang pengaring migpursiging mayap, ban arinan dakatamung masalang bukas, kapamilatan ning pamipagaral kekatamu, at pamituru keng kapibabatan ning pamagdulap kabiasnan at paintungulan keng bie.
Ing kanta masampat yang abalu at isa-memoria ning balang Anak Kapampangan, pauli ning keyang kaulagan at kabaldugan. Sana pakanta ya kareng sablang pang-anak a iskuwelang Kapampangan.
Y Tatang ampo’i Ima
kekatang pengari
e ta la pabusten
nanu mang maliari
Karela ta utang
kekatang kabiyayan
ing karelang binie
bie tang dili-dili
Koro:
Y Tatang ampo’i Ima
kekatang pengari
e ta la pabusten
nanu mang maliari
Karela ta utang
kekatang kabiyayan
ing karelang binie
bie tang dili-dili
— ooOoo –
Posted in () Pang-Anak, Anac Ning Arenas, Kanta
Leave a comment
Pawaga
keta pung aldo atin lang dinwang a sobri kanaku
at atin yang laman a e ku piyadyan;
metula ku mupin iti kayabe na
ning e ku ayagwantang ngisngis.
lalu na anti yang imalan a masanting
ing laman na nitang sobri
a kayabe nang makalulan
ning metung a sulat….
pablasang disan nakung anting metung a lubas
king pinandit a ita nitang tinggap
inya masakit yang misdingan
itang keyang laman
a anting malagung imalan.
atin kung kapanayan
a king kapamilatan
na ning sulat a ini
makatanggap o mirinan
metung a masanting a sangkan
nung bakit e ke dapat misdingan
itang tinggap ku pung ita
a kayabe na ning metung
a malagung kalatas.
at balu ku nung kenu ya man ibat ita
balu na nung nanung ing amawan ku
bista man ing sulat a ini
bina yang malabug karing aliwang makabasa.
Posted in Palaisipan
Leave a comment
Kulubasa
Bungang kukulate o gagapang a gule, lulutung gisang maki-sabo, panabe keng pakbit, o kaya gagawang kapangan a biko. Masustansiya la reng bungang kulubasa at makasaup keng sala da reng mata.
Posted in Bunga, Gule, Kataya
Leave a comment
Bale Kubu
Malating bale karaniwang bibungan palat, ilib, o pinaud, at sesagan bilbal a pun kuwayan, o ilib, o kaya sawali.
Posted in Kataya
Leave a comment