Mala-Soneto
© Irvin Harvey Rivera
Siuala Ning Maliwalu/Anac Ning Baculud
January 3, 2018
Mabikwal a dalan, sulungan mu Bungsu,
E ka tatakut ing sumubuk ka rugu
Magkang manasakit ma’t kabud mabigu,
Nung pita mu’t nasa king mayap painturu.
Samasan mong takbang ding adwa mung bitis,
Bungsu, e mo sana titikwas king labis
Pangilagan mu ing mitomba’t mitibis,
Ume kang matibe king lugma at tangis.
E ka tatakut ing lumakad kang dili,
Sopan meng talakad ing kekang sarili
Pablasang dimut pa’t binang mataloti,
Dapot nung nasa mu—malyari’t malyari.
Nung king sepu’t e mu na ngan ayaguantan
Kumawul ka ka’ku’t matigik kang talan.