ING AMANU NING LAJI


Casapua’cu pa king, babo ning sicluban
pepasuala cu ne, ing sabi ‘tang menan
iti ing gaga cu, neng atin cung adwan
at ing sagacga’cung mipnung caligayan

cabang daragul cu, at micacaisip
pakisabian da cu, king ba cung maglabit
e man malino ing, cacung asasambit
dapot cacu la ngan, deti mumulingid

Uling Capampangan, ing tiru ra cacu
nung inia balu rang, mangapampangan cu
ing dimut cung diwa, inalcus deng ustu
king pamipacamal, king sisuang amanu

Angga king lungub cu, king pipagaralan
mebiasang sinulat, memasa’t, memilang
ding talaturu mi, at cacaluguran
pati na caclasi, Capampangan la ngan

Maging ding ápû cung, meging mibalai
pengari cu ampon ding camaganac mi
apagmaragul cu at matning asabi
tal lang Capampangan, bait la ngan keti

Inia ring Amanu, a cacung pasualâ
ibat la king lipî, ring Indu cu’t ibpâ
e la pa man dintang, keti ring castilâ
macabait ne ing, mana tang salitâ

E la menibat king, nanu pa mang libru
a linimbag da ring, daywan kecatamu
e cu pa magaral, iniang mabiasa cu
king pamanialita, king sisuang amanu

Deti e co kinua, king lajing tagalug
caring ilucanu, ampon panggalatuc
o bisaya caya, ning Cebu at Negrus
at king Mindanao a, pugad da ring morus

ing cacung amanu, ibat ya king banua
pigcalam ne ning Dios, keta pang minuna
iniang lasaca’ne’ing, toreng babylonia
king marayung labuad, ning mesopotamia

Capampangan ya ing ibatan cung daî
Capampangan la ring, canacung palipî
Capampangan la ring, apalto cung binî
Capampangan ya ing, amanu ning lajî

Vhelle V. Garcia
December 16, 2016
Abu Dhabi

This entry was posted in Para Balen, PL Vhelle Garcia, Poeta Laureado. Bookmark the permalink.

Leave a Reply

Your email address will not be published. Required fields are marked *