https://www.facebook.com/permalink.php?story_fbid=184107757170634&id=100067142313608
Among Cao
September 7,2020
Miyampang ya iting mikudtang kawatasan para king Pakamalan tang Indu, ing Virgen de los Remedios, Indu ning Kapaldanan, king pamamuge keya anting Patulunan ning Lalawigan Kapampangan, king kapagmasusian na ning kayang Aldo Kebaitan at king Ka-64 Banuang Aniversario ning Coronacion Canonica ning Virgen de los Remedios, a-8 ning Setyembre 2020, king adleng acrostic, a pemansagang…
KAPALDANAN
neng Reberendo Padre Ronnie D. Cao, P.L.
K apamilatan ning nasa,
ning Obispung pakamalan
I Cesar Maria Guerrero,
ban kamtan ing kasaplalan;
King denasang kagutgutan,
mekaisip yang paralan
Ban busal ning kakaluluan,
‘tin tang lugud a tangalan.
A nting metung a balayan,
keti labuad Kapampangan
Maulang kasalpantayanan,
sinulung king kametungan;
Uli ning Krusadang tetag,
‘ting munag a selubungan
Menakit tamung pakibat,
king balang pamangailangan.
P anigapu tamu king Dios,
tutung mipapakibatan
Agpang king Kayang paralan,
atin tang grasyang akamtan;
Ing Virgen de los Remedios,
yang kekatang lalapitan
‘Nya mipapakayap tamu,
king kayang pamamilatan.
A rapang kapagsubukan,
kekatamung akabyusan
Uli ning kekatang Indu,
a parati tamung ausan;
King lugud na ampong lingap,
ala ping mipaimburisan
Makayantabe yang pane’t
ban kamtan ing kaligtasan.
L ayun tamu pang isundu,
maulang misyung gaganakan
Ipakit ing malasakit,
busal ning kapagsubukan;
Pairalan ing kayapan,
at ilako ing dewakan
Ba tang miwas king peligrung
magdalang kapahamakan.
D aranas ta mang pandemya,
king panaung salukuyan
Pasiag pa ing kapanayan,
keng masakit a kabilyan;
Ating kapayapang miral,
uli ning kapanupayan
At king pamagpakumbaba,
atin tang grasyang panayan.
A ntimo ing Virgen Maria,
ing Dios mu sa ing pamintuan
Atin tamu mang pamalak,
ing dapat ya pa ring gawan;
Neng ating pamangailangan,
yampang tamu ing kasuyuan
Mie sang mitmung katapatan,
king bieng ating katimawan.
N ung wa man, kaniting banua,
‘tin tang tradisyung gampanan,
King aliwa mang paralan,
lubus pa ring mipanuanan;
Coronacion Canonica,
ning Indu ta’t Patulunan
Misan tamu pang ganakan,
ban miral ing karatunan.
A nti ing sadyang daraptan,
king mabieng kapanaligan
Kaniting kapagmasusian,
manakit tang kabaldugan;
King saup ning Indu tang Mal,
busal ning kaligaligan
Atuklasan ne ing lunas,
at lingap akuang dagdagan.
‘N ya panatag tang maglakbe,
king bieng ‘ting karalumduman
Atin mang m’yaliwang sakit,
a kekatang panamdaman;
Kapamilatan ning Indu,
ating manatiling timan
‘Tin tang tula’t kapaldanan,
ngeni’t king kapilan pa man.
VIRGEN DE LOS REMEDIOS:
Indu ning Kapaldanan;
Tula ning Kapampangan…
“KAYANTABE KING PAMANINTUN LUNAS;
KASAUP KING PAMAMIE LINGAP.”
IPANALANGIN MU KAMI!
among cao/smap
3:11pm/08.14.2020