Misteryung Sentimientu

Masakit rumubdub king lagyung misteryu
Babala yang pait, lumbe’t dusang libu
Kasalpak ning lijim sukdulan mang yumu
Nung ding sentimientu sakbit no panginu.

Misteriu yang lijim king gulis ning palad
Pamikakunu yang babalut king ulap
Balang pamitagpung pipi waring bulad
Dirikilan sana ding mi’akmang pangarap.

Pane alang patna alan’ anggang kutang
Ing maleng gugulu keng gunamnaman
Maralas melumong pamitimbang-timbang
Lipus katarantan ning salung milantang.

Lijim a misteryung alang anggang kambil
Liling pamitulang e masupil-supil
Nanung parasan ning pagasang mesawil
Nung ing karapatan palad nang misakwil.

This entry was posted in Poetisa Maria Sinucuan. Bookmark the permalink.

Leave a Reply

Your email address will not be published. Required fields are marked *