Sinta eka manibughu kening kasuyu mung watas
A karing kalakandiwa king panyulat makipalkas
At kening Amanung Sisuan pakipalto pakikatas
Magkang ing Indung Amanu magape ya karing pantas
Ding mepanako mung oras emo labis pagsalbatan
At ding pangakung dusuldit mangapaku maigit misan
Detang mangaulagang bage dati eku kakaligtan
Emo sana pangalalu uling ika mung palsintan
At nung potang tutuki ku karing lakad ding Poeta
Lulud maki-galegale, dideklama mabut banua
Iti emu pamiyapis, e kakaskup-salu sinta
Uling meyumuan ya dila ing palsintang Poetisa
Nung sukcat mung apigunam ing palad ning kekang irug
Karing melalang a mortal, ditak karing mipagkalub
Ing iwaga ning Poesia karing bersadang mitutud
Nuan yang kekang Poetisa, tula ning Guinung Malugud