(Ing Traedia Na Ning Kakaluluan)
Lorung Malabit
Silaba 16 Sesura 8/8
Taladtad 4 Estorpa 11
Poema Naratiba
*
“Inda, inda, talakad ka, buklat mo ring kekang mata.
Lawen mo ring darala kung, metung a langgotsing kualta.
King pinandit muring ini, ing palyasa mamun na ya,
at king bie tamung magbayu, e ne mampit a misan pa.”
**
“Ing panulung makapaldan, at keka munye sikanan,
anggiang gintu ing alaga, agyu tana ngan saliuan.
Idala ra naka ngeni, king uspital kabalenan,
Ban ding keka na lumawe, ring manulung matenakan.”
***
“Palasak tane ing kubung, meging tuknangan da ring luậ,
manibat inyang i tata, atin yang tiking aliwậ.
Kilub na ning bayung baleng, patalakad ta’ng malaguậ,
Karing mata tamu’ing patak, pawa namung lua ning tulậ.”
****
“Ugse tana ing imalang, menansu at gisigisî,
a maralas misusulud, na anggiang e pa malangî.
King usu ampong mangamal, dakal tana ipanyalî.
Ing e maging kekatamu, ing kule mung e ta burî.”
*****
“Saluan ta ngan ing pamangang, maniaman at samut-samut.
E tana galukguk atian, ampong mangalgal king danup.
King tagan da ring aliwa, e tana gawan mamulut,
Itamu ngeni ing mamie, karing taung king bie dimut.”
******
“Ding wali ku magaral la, karing bantug a iskuela,
e bala anggiang misna pa, king kamal ing matrikula.
Anggiang mayakayan tana, aliwa ing mayari la.
Ban mitas la panlalawe, ring maldang tau karela.”
*******
“Inda, o’bat karimla mo, o’bat e ka magmulagat?
E mo wari buring akit, ding kualtang kakung akalap?
E muna sana sikasu, ing daya ku a papatak,
uling pinandit mu kanyan, akua na mu rin ma-ampat.”
********
“E rana man serya retang, guardiang mekabaril kaku,
sadiang ding kualta binie no, ning makibandi king bangku.
Mipakirut lamu uling, aniang atiu no king saku,
malagua nakung milayi, ban apa raka indu ku.”
*********
“Mepagal ku nandin inda, anya bina kung mangainậ.
Mekad mipapatudtud ku, anya dudurut ing sablậ.
Alang nanu naman ini, e ka sa migaganakậ
Magpainawa ku saguli, ding mata ku ipyak ko pậ.”
Rodel E. Gozum
17 Septiembre 2015
Munoz, Quezon City