Uling king bagyung Lando, sinapa la ding tugak.
Anala kasigla ela patugut kokokak.. inya menagkat ya ing pluma.
Oyni pu ing alalang na…
Kanitang ana’ku king Baryu Concepcion
Kalwal kung megaral panga gatpanapun
Kwanan ke ing padwas saka ku manintun
Bulating panapan kulkul ku keng gabun.
Kaibat kung menikwang bulating panapan
King kanakung padwas itungi ku no man
Saka ke itoto karetang libluban
Manikwa kung tugak e ku mangaynipan.
Karas ning sisilim mamaus ne I ma
Iyuli ku nala ding tugak kung ikwa
Kwana’nong balatan detang mangataba
Detang mangalati kaya lang kalilwa.
Ding malating payat kaya lang tadtaran
Pakwang tulud tangle kayang pisamutan
Saka no sangkapan at gawan palaman
Detang mangataba palamna’no atyan.
Ipiritu nala tugak nang betute
Potang malutu la dinan na keng dake
Arap na ning dulang mangan abe-abe
Makanyan kanitang milalabas ing bie.
Ngeni aliwa na itang bie kanita
Sasapa lang tugak keng gabun mamala
Misna no kasigla mipapatlalu la
Ketang gulisak dang magsilbi king masa.
At ding tugak a ren magdala lang apan
Ding memalen ilang nasa rang padwasan
Myaliwa itsura apan dang daralan
Pangaku… sardinas, ampon adwang dalan.
Kanyang pamanyagpang king apan dang yapag
Kakung paka-ingat mimisip banayad
Ustung migtako kung kininis king padwas
Yang akalupa ku ING BETUTE TUGAK.
BABAING MATUN 10/22/15