ARDIN DING SAMPAGA

Neng Almario “amor” C. de Jesus

*
Neng lulub ca ketang Ardin, dacal la retang Sampaga,
Anya naman ing madalas, maging salawahan mata,
E mu balu istung misan, sanu ing kecang pilinan,
Agtalan me ketang tangke, caring labi mu panuman.

*
Macanyan la reng poeta, lalawe lang tune legwan,
Uling itang inspirasyun, cailangan ning caisipan,
Detang sampagang mabanglu, macabye lang capasnawan,
Gad cang macalalang poesya, king dalaga kecang yampang.

*
Neng lalun ke ing litratu, larawan na nitang legwan,
Meging anac ya ing puso, meging mayumu cu timan,
Panayan cu ing pinandit ing ackit da ca sang misan,
King Ardin da reng dalaga, tutu racang pangawilian.

*
Anya sana cacung mutya, damdaman me at tingiran
Ining malucang poeta, alipan ning mal mung legwan,
E magbayu panlalawe, ngeni at capilan pa man,
Cabang atin cung inaua, icang dili ing luguran.

acdj

This entry was posted in PL Almario C. de Jesus, Poeta Laureado. Bookmark the permalink.

Leave a Reply

Your email address will not be published. Required fields are marked *