Kagli

Kagli
Lorung Malabit
Silaba 12 Sesura 6/6
Taladtad 4 Estropa 10
Adle Kapusungan (satire)
*
Maging tutu wari, ing awsan dang kaglî?
Mekeni kapatad, surian ta sagulî.
Nung atin mituran, iyan e ku burî,
pakalyan ku lamu, ring malungkut bilî.
**
I Sayung pengagli, re king burung mangga.
anggiang pang mayli ne, maslam ya pa lupa.
Lakuas na pa potang, medyu danupan ya,
anti yang mimilup, purung aslam sasa.
***
Ing indu nang Tina, aniang yang kakaglî,
king mapaling tidtad, asne king kaburî.
Aniang mibait ne’t, king bale re yulî,
itang kayang lampin, iya mung maputî.
****
Pengagli ra neman, king burung tilapiâ,
ing siping kung baleng, makilagyung Selâ.
Ania ing asbuk na, ibuklat niang bagyâ,
anti yang mamatut, king buluk na wawâ.
*****
Karing bumberu ne, pengagling inda na
itang kaklasi kung, awsan ta na’ng Maria,
ania ini ngeni, potang manyabi ya,
mandilu kang wawa, anggiang malaut ka.
******
Tutung maburi ya, king kamuting bagin
aniang ing indu na, pangagli ne’y Martin.
Meragul ya pin sang, milalu kasanting,
king buluk na atut, pilmi kang maduling.
*******
Pengagli ra ne man, king barakung bibi,
itang tau Porac, a awsan dang Gani.
Aniang meragul ne’t, migbayintau’y ni,
pangasawan no ring, bibing malilili.
********
Asne king kayamang, makiramdam radyu,
aniang pangagli neng, inda na i Cielu,
ngeni daig no pa, ring tv at diaryu,
balu na ing sablang, indredus king baryu.
*********
Pengagli da ne man, kang Leila De Lima,
Itang tau Lubao, a awsan dang Buda.
Aniang meragul ne, at meging dalaga,
bagya na la kapad, ding sagin a saba.
**********
Pututuan ku ne pa, keni ne mayarî,
ining kapusungan, a pitayitayî.
Pota ikutang yu, itang e ku buri,
uling e ku sabian, nung nu ku pengaglî.

Rodel E. Gozum
05 Septiembre 2019
Munoz, Quezon City