NANU YA ING KALUGURAN

Nanu ya ing kaluguran? Ing kaluguran a tune
Katuglung yang pangisnawa, kataid ne ning kekang bie,
King ligaya at pagmalun iti keka yang karame
Agyang datang pa ing bagyu e masira’yng pami-abe,
Sopan naka king kabigwan, kasulu me king tagumpe
Makanyan yang kaluguran nung tapat yang maki-abe.

Nung sakali akit nakang tutuntun king lisyang landas,
Yawat naka at tairan ketang parasan a mayap
Ban kanita emu dasan ing lumbe’t pangapahamak
Pablasang nung tumangis ka, muna yang keka magsalbat,
Makanyan yang kaluguran daig ne pa ing kapatad
Nung atin kang panandaman king sarili na kakablas.

Nanu ya ing kaluguran? Nung tutu ya at malugud
Ketang kekang kagulutan Angel ya waring tatanud
Magbante ya balang oras nanu man ing kekang kimut
King matsura’t maling bisyu kanita e ka mayabluk,
Nung sakali king kaskupan akit nakang makabaldug
Sagipan naka’t isaka ban keta e ka malumud.

Nanu ya ing kaluguran? Iti e ya bante kuran
Agyang kaya migulut ka e ya maging kaligiran,
E anti ing sarul gamat pane nakang kakabiran
Potang ala neng akakwa ngana marok ka gagawan;
Lipit ka man king bili mu e naka rin painggulutan
Makayan yang mayayakit… ing tapat a kaluguran.

BABAING MATUN/ 12/26/14

This entry was posted in PL Kate Lapuz, Poeta Laureado. Bookmark the permalink.

Leave a Reply

Your email address will not be published. Required fields are marked *