Ing Malyap Kung Paninap

Lorung Malabit
Silaba 12 Taladtad 4
Sesura 6/6 Estropa 9
*
Kanita bala ku, malyap ka’ng paninap
a anggiang nang daptan, ku e ku arakap.
Ing e kata bage, maluat ku nang tinggap,
makagyu na kaku, ing pasuglapsuglap.
**
King sisitsit na ning, kalulung pusu ku,
magmaklak-maklakan, ku’t e ku sikasu.
Uling talus kung ing, yumu ning lugud mu.
anggiang kapilan man, e ya maging kaku.
***
Sisikilan ku ing, kakung daramdaman,
a gugutgut kaku, angga king pagkeran.
Aguantan kung pilit, ining kapalsintan,
pauli ning ala, iting kapanayan.
****
E makalingad ing, alangan ku keka,
uling malagu at, kasibulan mu pa.
Samantalang yaku, maung kung kupas na.
Ing kabayangnan ku, linipas na sinta.
*****
Pablasang metung kang, sampagang malagû,
dakal a talubang, a misasaglulû,
ban king kekang banglu, ilang makasamyû,
nung tanggapan mu ing, yampang dang pangakû.
******
Anggiang ninu man ing, sumuri’t lumawe,
malaut kung tutu, at e ko kapante.
Ania binurian kung, ken na ku mung lele,
ban king upayang e, ku mipakarine.
*******
Napun aniang kaku, kabud mu sinabi,
a king kekang pusu, yakung makibandi,
e ku na balu nung maglua ku o maili,
e ku na aintindian, ining malilyari.
********
Magsilbi wari ing, diosang anti keka,
lugud ya kanakung, maluka at matua?
Malilingo na ku’t, e ku na abut pa,
nung maninap ku mu, o iti tutu na,
*********
Nung ing malilyaring, iti paninap man,
e na ku talakad, king kakung pagkeran.
Uling ing ligaya, a kakung pamitan,
king kalulu kung bie, ngeni pa dinatang.

PL Rodel E. Gozum
24 Setiembre 2017
Munoz, Lungsud ning Quezon.