Anggiang Misna King Kasalpak

Lorung Malabit
Poema Naratiba
Silaba 16 Sesura 8/8
Taladtad 4 Estropa 10

*
Dinatang ka king panaung, makagapus naku pusû,
at ala nakung matulid, magnasa king kekang lagû
Atin nang makibandi a, gagamit king kakung lagyû,
ania ala nang sangkan ban, kabug ya ing kakung salû.

**
Dakal namu rin linapit, a tuksu king kabud kung bie,
pengilagan ku ngan ban e, masira ing kakung sale.
Uling ing bawal a lugud, mengari yamu king ane,
ditakditak neng ngatngatan, ban alasak ne ing bale.

***
Karing leguan a sinubuk, king kakung tagle tetagan
makayaliwa kang dili, king keyinan mu ku tiran.
Agyang nanan kung aguantuan, ing masiring daramdaman
e ku agawang labanan, ania lakuas mung sisikan.

****
Uling e naku timawa, e ku asaglawe keka,
ing atiu busal ning salu, a malabis babalisa.
Ing kapalsintang lulukub, king pusu ku at kaladua
pepakit ku king paralang, paramdam mu ‘t e deretya.

*****
Dapot e milingad keka, ing tutu kung kapagnasan,
malagua mung abitasa, ing tune kung paninasan.
Kingua mo ring kakung gamat, a matigik mung telanan,
bilang tanda a pareu, ing ketang daramdaman.

******
Manibat king oras ayta, miglungad ku king ligaya,
anggiang nuku man lumawe, ing sabla migkulul rosa.
Ding pinandit tang pisulu, king paling alang kapara,
balaku e na mapupus, angga na king alang angga .

*******
Pauli na ning pandemya, meputut ing pamigtamû,
karing mensaji ta namu, misasabi’t mipanyuyû
dimdam ku king sarili ku’ng, ditakditak kang daráyû
uling ustung makibat ka, malagad at makuyad mû.

********
Anggang dinatang ing aldong, e naka bisang makibat,
parati kang atin sangkan, a kanaku mu ngan susuat
Mekad mekatagmu na kang, bayung katalnanan gamat
Anggiang misna king kasakit, ala nakung akarapat,

*********
Sana e mengari kakung, atin nang kabangal king bie,
ala ka sang kasamsaman, at balang oras solu me
Ing ingatan na sang lagyu, agyu ne pang keka ibie.
ban king lugud mung pamitan, ali naka makirake.

**********
Ing e ku adaun keka, agyu na sanang iyampan,
ita namu ing panaplak, ku king pusu kung mesintang.
Nung matula ka king bayung, kapalsintan mung atagmuan
anggiang misna king kasalpak, maligaya naku naman.

PL Rodel E. Gozum
San Simon, Pampanga
02 Disyembre 2021