Kapurian at kapasalamatan Keka, O Ibpang mayupayang tutu
Regalung tutung maula, kekami yang pigkalub Mu;
Uli na ning Anak Mung y Jesus a mikatawang-tau
Sibli Na ing matas nang dangalan ning kekaming pangatau.
Nuan Ka, O Dios ning kayapan at kayupayan… lugud at pakalulu
Inaus Mu kami ba mi lang lingapan ding kalulu;
Nung nanu man ing ayampang mi king pamanyuyu
Gawan mi ing sablang bage agpang king kaburian Mu.
Kawangis nang Jesus, a kekaming Guinu…
Anting malalaso asin at maslag a sulu
Yampang mi naman ing kekaming lasa at sala king meto-yatu;
Anting Mayap a Pastul at Maestru
Nung nanu ing tutu at ustu, ya mu kabud ing kekaming ituru;
Anting Dalan, Katutuan at Bie king pamakiabe Mu, O Guinu
Kayabe mi la sang maglakbe ring malilili, mililele at mitatauling kaparang tau;
Anting Mabie Danum at Tinape ning Bie karing “Samaritanu”
Ninumang painuman at pakanan mi, e na la sa kumau’t dumanup pasibayu.