© Neng Jose M. Gallardo
c. 1944
Micacsing ing acbung qng pamibarilan
ding migatbang tapuc a mipapatayan —
libutad na nitang verdeng caparangan
a nung nu mitabnu ing aduang sicanana:
Ing sican ding taung mauang catimauan
laban caring dayung bisang manalipan.
Itang caparangan melasac mo uari
qng ugung na nitang acbung a mangatni’
Ding balas anti lang susulapo api
a mamius bubungil manintun asaui;
at babo na niti… ya ing mamayani
itang gulisac da ding caual ning laji.
Capupus ning bengi, camate ning pisac
ala na ing acbung, ala na‘ng gulisac’
Libutad marangle ding menga-pajamac
ila na‘ng mitagan a disa ‘ning abac:
bangque la‘t sugatan a minalduc salpac
at dadasayan da ing dayang dinanac.
Qng metung a suluc atin tamung aquit
matuang yang sugatan a magcacasaquit;
mangapangis-ngis ya at mangapaquibit
anti ya mo uaring managuantang saquit,
ding adua nang mata ta ‘lu macapiquit,
quiqueta ‘nong labi… saca mamalipit….
Pilan mung penandit milagat nong mata,
mibangun ya‘t saca tinalanga banua;
“Balen cu!” ngana ‘ning piping gulisac na:
“Caniama ‘ning mate qng casuyuan queca,
e bala ing maguing bangque cung marimla
mitimaua ya sa ing quecang bandera…!”
“At queca, babaing cabislac catauan,
cambe ding supling tang pacamal-camalan;
icong quecuyug cu at cacaluguran
querame‘t quesulu qng tula‘t cascupan;
ing camatayan cu e yu panamdaman
bista ma’t mate cung e tamu miquit man.
E yu calulungcut, e yu calulugma
ing camatayan cu nung masaquit man sa;
pulisan yong mata, palangian yu ing lua
saca co tumiman qng masolung tula,
uling ining cacung sasaguese daya
cayabe midampul qng mal tang bandila.
Qng camatayan cu ala cu mang lacuan
a ipamana cung salapi‘t pibandian;
ala…! nune mu pin ing cacung calucan
at ing bayad na ning cacung camatayan;
Oyan saganan ye‘t layung pacamalan
Cabutil yang guintu, guintung catimauan…!
Oyan qng aslagan lipat na ning biga
ati ’na mamunag ing simbul ning laya,
Oyan…! saganan yang palacpac at tula
ba ’neng patindagan ing mal tang bandila;
caibat nung ati ’ne… ganacan yu que sa
iqueng capatad yung qng dulum miragsa…!”
Tiniman ya queta… timan a macule
ing bayaning matua saca ne miyungle;
ing gaga ding ayug… ing buang ning marangle
melungcut anti mong metung a punebre,
uling ing matuang iquit tang mipase
pilan mung penandit… marimla neng bangque!