Makuyad A Poesya
Irvin Harvey E. Rivera
Siuala Ning Maliwalu/Anac Ning Baculud
March 1, 2020
Mengalingwan na ku at migtyamantyaman,
King Sintang Amanu, mengalimbatawan?
Mayap a talindo, kabud ku gilutan,
Sikwil ku ing nasa, minaliwang dalan?
Tebugan ku na ing pamamikudta ku,
Nung alang babasa nanu pang daptan ku?
Ninung magsabal pang mamasang kwentu,
Nung ding ginulis ku, pipi lang amanu.
Ninung sumulat pin nung alang babasa,
Nung ing sukal a lub nung yang manganyaya?
Na’n ku pang sumulat nung e na ku bisa,
At ding balang Bersu—magadtu lang diwa.
Mapilang Poesyang sinulat ning gamat,
A mibabata king tikal at pulikat
Nung den magdala la’ng pagal ampong puyat,
Maya’pa na mu ping e ku no ibuklat.
Paklayan ku nya naman mataram kung Pluma
Saka ku no yugse kudta kung Poesya
Ding ‘gang Amanung guingkas ding Poeta
Kalingwan ku no ngan meguing panalala.
Kapitangang bengi e naku maglame
Pamamikudta ku, kaku nang ilele
Ing Sintang Amanu pabren ku neng mate
Magpyak na ku mata’t e naku mipakde.
Dapot nung bustan ku king pamanganyaya
Ing mal kung Amanu, mapupus ya Kalma
Aku nang Papate king lagu nang sarya
Kalapastanganan! Nung akung midagsa!
Inya ing gewa ku, pluma kung mataram,
Malaleng pinekat king papil a megyam
Karing lindayug ra ring Bersung makalam
Mibusni ku isip at e na pabalam.