Neng Orly Manalo Dizon
(Our 46 Years Wedding Anibersary today,
May 1, 1976 × 2022)
1
Dacal lang babai / cacung akilala
Dapot ing laue cu / macayaliua ca,
E mu ketang lagu / acakit ding mata
Nune king ugaling / sasalamin keca.
2
Muna tang pamikit / a anting pitabnû
E cu apiuari / nang linub king salû,
At e cu alingad / cablas na king pusû
A nung nanung sangcan / iti e cu balû.
3
Micacunu cu man / linapit cu keca
Agiang e marapat / ing akilala ca,
Uli na nita nang / itsura cang diosa
Abe ding angeles / kinuldas ‘bat banua.
4
Manibat canita / canacu mibubû
Ing ausan dang lugud / king pusu tinubû,
Lugud yang dalise / tinarac ning paslû
Nang Aring Cupidu / kening cacung pusû.
5
Malinis cung nasa / king pusu manibat
Linapit cu keca / at dinuang ding gamat,
At binye mung sucli / mayumung pakibat
Malugud mung tinggap / palad ta milapat.
6
Mabilis lang meco / lacad ding panaun
Aldo, bulan, banua / cacu meki-agum,
Matapat cung sinta / lalu pang linabung
King angga na ketang / pusu ta migmetung.
7
O casampat pala / itang atin sinta
Ing pakiramdam mu / ‘tyu babo ning banua,
At cauangis uari / metung a aguila
King babo ning biga / lilibad, magbiba.
8
Iniang marap ta na / king altar ning Ginu
Para miyaptas la / pusu mu’t pusu cu,
Lugud cung masapsap / iti keca ya mu
ICA MU ING SINTA / at e cu magbayu.