LUMALAM YA SUGAT

diuang capalsintan neng ORLY MANALO DIZON;
Sucad: 6/6; Orthografiang: C-K;
May 9, 2017.

1
Lipat ding dacal nang panaun linabas
E co pa auari lubus atalastas,
Ing cagulutan ning pamamie mung uacas
Na ning kecang sumpa a cacu mu gingcas.

2
Linaut ing lub mu bigla cang migbayu
E mo pakibatan deta nang aus cu,
At ing pang masolu tilducan mung ustu
Babandung ala na pisucung tang planu.

3
Bistat macanian man ing cacu mu geuâ
Mangibabo mu rin cacung paniualâ,
Datang itang bucas magbalic cang biglâ
At misan pang musbung lugud mung meualâ.

4
Macanian ya tatag tibe ing pundasyun
Na ning cacung lugud pinde ning panaun,
A cabud ya keca lubus keng daraun
Ini nang sumpa cung dalang cu king aun.

5
Dacal tang maralas icang gugunaman
Capitangan bengi cacung tatangisan,
Detang mangasayang aldo tang miralan
Mesalpac dang lasa cacu lang acmulan.

6
Pane cu pa itang yambing ing sarili
Careta nang martir king bie meguing api,
Cacung pibabatan dusang babie niti
A pasari nitang lugud alang suerti.

7
Macananu da cang laco kening isip
Nucuman lumaue ica ing acakit,
King panga-atiu mu nung buclat meng pilit
Ini nang pusu cu icang macadukit.

8
Macanian cu ualang magmalun, magsalbat
Uling kening isip ya’ng pilit mamaslat,
Ing tanggapan cu na ing ‘gang mengarapat
Maguing man ing pusu LUMALAM YA SUGAT.

Repost: DIZLAG FARM, May 4/22

This entry was posted in PL Orly M Dizon, Poeta Laureado. Bookmark the permalink.

Leave a Reply

Your email address will not be published. Required fields are marked *