Mala-Soneto
Irvin Harvey Rivera
Siuala Ning Maliwalu/Anac Ning Baculud
May 13, 2018
Ing meging kalulu tikman ku na lasa
Meging kasulu ku, kayabe kung metwa
Disan kung menyawad kanita king banwa
Baldugan da ke sa’ng marakal a kwalta.
Bang kanita sana ring pakakalulu
Minawa la king bie’t e no mangalulu
Dapot ing paninap malyap yaping tutu
Ing bangungut king bie ya’itang mekisulu.
Kalulu ing awus keka ming maluka
Malyap kekami ing bie a masaplala
Nanu man king bie mi, king oras mitakda
King aun mikutkut ke nga’t mangaragsa.
E na bala kaku ing mate ku’t mikutkut
E ku sa’ minawa king pamangurakut.