Makuyad A Poesya
Irvin Harvey E. Rivera
Siuala Ning Maliwalu/Anac Ning Baculud
May 20, 2019
Metung ya i Fidel karing makisugu
A makipangalis king sitiu Pangulu
Kabalwan yang Anak a metung kalulu
Kilala re maging sitiu pulung bulu.
Ing makipangalis yang kapad nang obra
Uling anak ya pa yang tiru ra kaya
Ding keyang pengari uling maluka la
E ra ne pegaral agyang king High School pa.
Uling masipag ya at ating pangarap
Ing malukang Fidel tutu yang megsikap
Kabalwan na kaya ing anak yang Mayap
King kapanintunan karin ya migagap.
N’ya naman ding kayang malukang pengari
Asno king katula king Anak dang ayti
Ala yang problemang binye na kareti
Ing yutus da ka ya yang pane malyari.
Ing kwentu nang Fidel bakas ne mung likwan
Ding mayap a Anak na ning milabasan
Kwentu ra ring sabla king kapibabatan
Milabas a napun ning bie kayanakan.
Ngening panaun ning bayung henerasyun
Ing kwentu nang Fidel kabud n’ya mitambun
Ing pamagbayu ning aske ning panaun
Yang kasangkanan na ning mewalang padrun.