Makuyad A Poesya
Irvin Harvey Rivera
Siuala Ning Maliwalu/Anac Ning Baculud
September 29, 2017
Sipwak na ku keti king sulip ning yatu;
Peragul na ku king lugud na’t panaru;
Mata kung makapyak milagat ku no mu;
At ing sala ning bie, pepakit nang Indu.
Matarling ing balang siwala ku’t tanguis;
Ding gamat nang Ima ku ilang minapis;
Malaleng minuma kaku at miglambis;
Bukud nakung Anak a alang kawangis.
Ding tumaila na neng abak a maranun;
Ilang pakatudtud nung e mipaindatun;
Ding utang ku kaya a misusun-susun;
Pakatandanan ku la kabang panaun.
Ding timan at ayli a e ku asukad;
Mabut no king biga a lilimpad-limpad;
Ing binye nang tula ka’ku keti labuad;
Kapilan man e ku kalingwan at lingad.
King karulumdumang babatyo albugan;
Mapilan na la mung aldo mitatagan;
Sasakit ing bie at lalbug ne ing bulan;
Anggang binit ke pang ipuk king kanawan.
Kabang atyu ya pa kening ka’kung lele;
Gawan ku na’ing sablang bague masalese;
Uling ala na kung akit Indung Tune;
A magmasabal at babye’ing kayang dake.