Neng Herman Pablo
Anak la pamu ding atlu ila nang mikaluguran
Nukarin ya man munta ing metung adua tiu la naman
Potang lungub king eskuela ‘tin mitawli dang panayan
Angga king pamanuli ra alang karelang maglakwan
Manibat pa elementary ga king college mikaklasi
Angga miras ing graduation kailangan dang mikawani
Ilang binang mengalungkut manintun obra, apisabi
Pantunan dang kapalaran kailangan dang magsarili
Magbakasakali la ngan kanya kanya na lang lakad
Karelang penintun bie nuka nukarin nala mipadpad
Nung ini na pin ing swerti karela e meging malyap
Miras mitakdang bie tutung e da man peninap
Mikatagun ining oras e piadyan mikit ding atlu
Balang metung karela ating alaleng apulu
Ing damdaman mu karela ilang mapera’t magarbu
King disenting da ngan asta mabandi’t marangyang pustu
Mipangomusta ‘t ding atlu keng meging dang kapalaran
Tambing binida ing metung ‘drug lord’ kakung kesaglakan
‘Gambling lord’ ing sinabad kadua yang mangalandakan
‘Praise da lord’ ining katlu ing marine namang sabyan
Tambing mengutang ding adua ot meging kang milyunaryu?
Masanting nang ipakibat ing mimisip ya nung nanu
Sabi na, dening abuluy babo ilang iyatsa ku
Deta mu naman mabaldug keng gabun ilang sweldu ku