Ot mate ya ing Capampangan

Deng Capampangan Ma-panatindi la, sobra. Nung atin yang susulud a masanting a kupya, inatu ne ning bisita, ibiye na ne. Nung taga-Tagalug ya ing dinatang a bisita, e na ne subukan pakisabyan keng Capampangan, kusintirulan na ne keng Tagalug.

Deng Capampangan, Ma-ambisyun la. Gawan da ing sabla ban apirusta ing karelang ambisyun, baski panganyaya ing Amanung Sisuan. Nung yan mung salita rang Capampangan e re agamit ban mitas la keng mata ning sociedad, inya Tagalug ampon Ingles ing karelang paningayang pakipagsalita. Deng karelang anak e la kanu misensu nung Capampangan ing karelang akalumon panyalita. Dapat gamat de ing Tagalug ampon Ingles.

Deng Capampangan, Ma-amorpropiu la. E ra buri ing marurokdok. Kailangan dang pabalu keng mabilug a yatu nung biasa lang miayaliwang salita, Tagalug, Ingles, Tsekwa, Japon, etc. Lawen mu la reng lagyu ra ampon chat keng Facebook. Capampangan no man kanyan deng karelang kasabi. Dapot kailangan da pin pabalung biasa lang Tsekwa, Japon, o Ingles. Mas apasiag de mo kanu ing karelang kapamalakan at kaisipan keng aliwang amanu kesa keng Capampangan.

Makananu yang e mate ing Capampangan?

This entry was posted in Sanese. Bookmark the permalink.

Leave a Reply

Your email address will not be published.