Tagulele Ning Indu

© Maria Sinucuan

Misan man e mipatando keng ngeni matbud nang diwa
A misan miras ing aldo ilang kalaguyo ring luwa
King keraklan ding anak ku ninu ing sukat mibala
Datang ing pamikatagun mangalingwan la’t mawala
Eko wala apigilan ding panaun manyariwa
Ketang anti napun pamung sipwak ku la king masala

Ding anak kung ni paninap e ku ninasang miwale
Pablasang keng kakung salu yang karug kung ikalumbe
Bista man lub ning pusu ku tagimpan lang managumpe
Balang aldo keng ligaya masayang miyabe-yabe
Dapot yang gulis na mekad tagana nang tutuk ning bie
Ing sablang kimtang ligaya ating lungkut kayagape

Kapilan ko pamu napun pagtumaila aldo’t bengi
Kukumunan karing takde pagtitirin dilidili
Alus e buring parugpan keng maski yamuk mang lili
Pablasang bagya mang mansa e ko papangasna deti
Yang salusu kung pulandit bagyang bungit da ma’t aili
Alang anggang pamakamal ing karela ku pigsilbi

Tunggal-tunggal lang meragul kasabe lakad ding aldo
Keng siping ku’t panimanman metung-metung lang meglako
Ban dulapan ing kabiyasnan mabut keng ayang talindo
Sukat nang ipagkapuri ning Indung mapagparayo
Iti natural neng lakad ning munag bayung siniro
Ninung Indu ing lub sagka ban ding anak magpatilo

Dapot ngeni atiu na la keting yatu makilulu
Nung nukarin mangaparas keng deklan da’t tagle balu
Dakal la pakisalamuwan nung kenu makilaguyu
Nanu nanung kapagnasan keng bie ra makarahuyu
Mekad keng sobrang ligaya at tulang makagiyam pusu
Dit man e ne sasalangi keng pamisip da y Indu.

This entry was posted in Pamilya, Poesia, Poetisa Maria Sinucuan. Bookmark the permalink.

Leave a Reply

Your email address will not be published. Required fields are marked *