Misan a panaun;
king metung a baryu, a binang maliblib
catacup ning silim;
caretang memaryu, ala nacang akit
magculung no bale;
e na la titipa nung inia tahimic
biung na na ning angin;
ing kecang damdaman at kiac ding culiglig
pablasang canita;
king mesabing lugal, ala pang curyenti
inia mibalitang;
dacal a manakit, ticbalang at capri
lacuas pang mesiri;
ing tacut ding tau, caras na ning bengi
pasari na nitang;
maglacung balut a, carin mipalili
Ing magtindang balut;
pagmumulalan de, nung nu ya manibat
cabud ne mu lalsut;
busal ning dicutan, king dalan a gasgas
Ing datucanan na;
caring titinda nang, cayang gugulisac
maragul yang basket;
a bibitbita’na king wana’nang gamat
Itang cayang suala;
ngana ning metung a caya mecaramdam
macapangilabut;
anti mong manibat, kilub ning tapayan
ing metung pang bage;
a ayala’cu king, magbabalut a yan
daratang ya keti;
ustung masala at mabilug ya’ing bulan
At neng lalacad ya;
gagalayud no pa ring cayang sapatus
e me akit lupa ;
uling malapad ya, ing cupya nang ebus
inia caring tau;
alang mengangas at mig masican a lub
culaitan de mu man;
ban sali caretang, titinda nang balut
maging ding manasan;
at susulung tugac, king tacut da reti
e no bisang dulung;
ban lang manintunan, caras na ning bengi
pelalung magtinda;
king mesabing baryu ampong negosyanti
ena manakitan;;
at sasaingsing na, ketang pangalugi
At uling linto ing;
dacal a problema pasari ning tacut
misasanmetung la;
ding anggang memaryu’t, agad nang kinimut
ngana ning kapitan;
“itamung lalaki e tamu matudtud,
Pakibaluan tamu;
ing misteryu dikil, king magtindang balut”
Iniang dalumdum na;
ding anggang lalakiii, mitipun-tipun la
magdala lang sibat;
salapang at lait, a peka armas da
at ban sican la lub;
king carelang nasa apicayari ra
tumage la pamu;
ban e la mainip, king pamanenaya
Sactung alas dosi;
pablasang taimic, na catni rang dimdam
Itang kulait na;
nitang magbabalut, king gasgas a dalan
iniang catulid na;
caring manenaya king cayang paniatang
Inaus ne nitang;
metung a lalaking magtapang-tapangan
“Sali ko pung balot?
ngana ning magtindang carela linapit
“wa” ngara at itang;
tacap na ning basket, gulpi reng linislis
mipagulisac la;
uling e la balut, ding carelang ikit
nun e penoy la mu;
pablasang atin lang marcang aduang gulis…
carapatangbanding pawaga 2011 neng:
Vhelle V. Garcia
August 14, 2011
Abu Dhabi, United Arab Emirates