Ernest C. Turla
[AmanungSisuan] ing bili ning amanung Kapampangan
Joel, e ca mesayang mu oras queng pamanyulat canining macaba mung article uling dacal la reng mecabasa. Ania mu alang mag-comentu, siguru uling tatacut lang maquialam pota micamuanan la careng Tagalista. Pero buri cu sana qng sumaup lang maldug tangap queng dapug ning pisasabian aiti para milablab at micalat mabilug queng sacup ning Kapampangan. Casi dacal careng cabalen tamu e ra balu ing cabilian na ning salita ra. At munang-muna pa pala, e ata macatanam careng pusu ra ing lugud queng salita anting centru o “nucleus” ning carelang cultura. Deng tau ustung anti la caniti calubac queng nung nanu man ing carelang panga-lahi, saguli lang masacup careng lulusub a daywan. Careti, e na bali nung ninu ing atyu queng poder a gumubiernu carela. E bali carela nung daiwan la reng sumacup carela.
Nung ing capara rang Kapampangan e re man suportan queng cayang paquicuanan (anti mo nung magcampania ya queng politica), o ing pamong salita ra neng isipan dang ala lang paquinabang caya?
Ania sana pin Joel, deng cabalen tamu e re papaburen matda ing salita tamu. O iqueng atyu queng aliwang lugal e miya paburen, eh. Gagamitan miya aldoldo ning Mrs. cu queni bale ampo ustung Kapampangan lang calupa mi reng capagsalita mi. Mag-English cami mu ustung e la Kapampangan deng capagsalita mi.
Sana isundu mu ing pamanamuyut careng cayanacan quen lacuas na qng HAU queng pamangamit Kapampangan. Queng sanang campus, nung e murin English ing carelang gagamitan, Kapampangan sana quesa queng Tagalug. Macanian mu naman sana careng aliwang colehyu anti mo ing AUF, RCC, AC, DHVTSU, PAC, TSU, SMC at GNC. Ustung queng sanu mang grupu, dapat deng minority ilang tutuqui careng majority.