neng almario “amor ” c. de jesus-
Anac Capampangan . . . .
Nanu tang gawan mu, bacang makasuyu , king Indung Balayan,
O’bat angga ngeni, magcacasakit ca, king pamibabata?
Anto retang Anac, a maglipo-lipo, paintunan nang Sisa,
Ot e no migbalic, keng penibatan dang, kandungan ning dusa.
Anac Capampangan. . . .
Ytang kekang Singsing, nung noya mebating, e mu amalayan,
Sumaup cang maintun, agyang mabayat pa, ing kecang dalanan,
Tukian mu la retang , sisime marangle, ampon caparangan,
At e ca tutucnang, o caya painaua, agayang ditac mu man.
Anac Capampangan . . . .
Manamuyot tamu, lalu careng anac, magaral Amanu ,
At e picarine, iti gamitan ya, caba ning bie tamu,
King pibalebale, maging king escuela, lalu neng sisimba,,
Itanam king isip, at e cacalingwan , ing salitang mana.
Anac Capampangan. . . .
At nung malsinta ca, itang panamdaman , sit-sit mung malale,
Pasyag king Dalaga , ing kecang parasan, a malsintang tune,
King Amanung Siswan, sari king kalambing, panirug gale me,
Pusu ning dalaga, at ing mal nang uwa, keca na la ibie.
acdj
Rafael Maniago
Mipaka-kama, mengapa-mulala, misdan mipakirut,
karing amanu mung maka-bersung tune, a paka-salikut..
linwal lang mibugnus, keting male-paran, ning bye salimuyut,
Kang Amor ika nang poetang linage malino, a-mapanimuyut…!
Kanitang minunang akilala da kang banayad mag-kudta,
e noman makanyan ding kekang amanung, malalam bitasa,
mapilang panawun a kekang gigulan, pamag-rimang bina…
e ku no a-kulkul, e ku no a-yabut, a panga-salita…!
Ika pin ing tune, Anak Kapampangan, a maka-salale..
midinan regalu, king pamangamanu, busal ning marangle..
kaniting poesya, a kekang lalantad, a kekang darake,
pagmaragul na ka ning kekatanq balen, a kakung a-yapse…!.
Almario C. de Jesus
Author
Mitas cung carangan. careng amanu mung, cacu meging diua.
Yca itang maestru, canacu mituru, magrima, mag-bersu,
Ginamit cung padrun, lalalang poema, a meging modelu,
Sablang abalu cu, caministilan mu, idake careng tau,
Salamat Ca Paeng, pamicaluguran, matimbang canacu,
Mimingat ca sana, at miabe catang , sesen ing amanu.
acdj 1/28/2021
Rafael Maniago
Isundu ta iti, king lagyu ning lugud, king amanung siswan…
kekatang ikalat king labwad ning sinta alang kapilisyan
ninu mang manakit, piyadwa tang watas, kekatang lalangan…
Kang Amor, e wari, ika ampo yaku, Anak Kapampangan,
pibuknulang pusad, ing kekakatang pake, ba teng pagtibayan…
lugud king amanu, babandu tang lalu.. karing kayanakan.