(Ing minunang dili at tapat a liguran cu)
Happy Valantine Inda.
Neng Almario “amor” C. de Jesus-
Ing lugud king Mal a Indu, nung ipinta me’ ing tune cule,
Pinturang gintu at pilac, itang tingcad e na abye,
Menibatan king pusu na, itang sintang keca binye,
Meging ligaya na caya, pinunla na at sinese.
Ninu uari y Indu mu? anting metung yang cometa,
Mabilis pangabulasuc, kinislap menibat banua,
King dalumdum na ning bye mu, pepakit na itang sala,
Biklat no ding kecang mata, lugud at dalise sinta.
Siam a bulan mabuctut ya, cambe ning sakit at dusa,
Alus itang camatayan, yang meging cayantabe na,
E na picabiang ita, ligaya na’ing mibait ca,
Uling daya na ca’t laman, ning laman na at daya na.
Magcanta yang papasusu, king candungan matudtud ca,
Terac na ca’t panaplusan, at panirug ing uma na,
At cabang daragul na ca, itang mayap tuturu pa,
Lugud king Dios, parang tau, mal a balen a tibwan ta.
Anya nung maangu ne bye, pacamalan a Indu mu,
Anti neng mepitna keca, ing sala na niting yatu,
At itang silbag nang lugud, nitang mal a GINU tamu.
Cabud na mipanpan keca, calmang lumbe pibatan mu.
Ala na ngening mamaplus, cacaul, mumuma keca,
At ala nang mituturu, sasaup keca mamingua,
Ninu ing kecang lapitan, king busal na niting lugma,
Dili mu na mung tatangis, pibatan mung meging calma.
Talaga yatang macanyan, ing mabibye lalam banua,
Magsaya ca o matula, lungcut at tutulung lua,
Anya iti tanggapan mu, yumu’t pait alducan la,
Neng iti yang caburian na, nitang Dios tang Mayupaya.
Uling deng sablang melalang, tutuki la ketang agus,
Nung nucarin itang sabla, ketang dagat ngan tataglus,
Keta nang pangabait mu, nanung tauling caulian mu,
Itang datang mu pang bucas, gabon ni’ya ing pagkeran mu.
Anya ica o penganac, e mu dapat cacalinguan
Cabang caba na ning bye mu, itatac mu king caisipan,
Ing lugud ning kecang Indu, iti alang cayangganan,
Tapat e pamagcunuari, lante gintu’ng panamdaman.
Puryan la deng Indu tamu, itas tala king calucan,
Itang puri dang ingatan, e ta dapat mumusingan,
Casampat na sana Indu, nung malyari mu sang gauan,
Tipunan cu ngang sampaga, mitmung lugud keca iyampang.
acdj