King lagyu na pa mu ning sabing Clark City,
a makisaut mu king labuad ta’ keti,
tambing yang linisya ing lagyu na niti,
at ing pauaga na e ne mayap iti.
Ing lagyung Clark City a cacung tutunggen,
e tamu alingad itamung memalen,
bisa yang mag-ari king kecatang balen,
dapot nung malyari, e ta’ sa’ paburen.
Sucat ta’ng ganacan at pacaisipan,
ing maging dulut na king labuad ta’ng tibuan,
ning lagyung Clark City ibat caring dayuan,
ngeni mekilala careng Capampangan.
Nanu uaring sangcan ning cacung mumulat,
dikil kening tema a cacung susulat,
ini papasiag na nung nanung marapat,
bang ing Capampangan e ya dagul sugat.
Ing amanu tamu binie ning Miglalang,
dacal nong sinubuc a meging casalang,
king pamirapat dang buri reng asintang,
at mangga man ngeni e nala tinucnang.
Ding Cultura tamu ilang cacung sabian,
a amana tamu careng pipunpunan,
ganacan no caya at apaulagan,
ning lagyung Clark City king mismung carinan.
Kening cacung cudta dikil king Clark City,
macagunam tamu at macapanyuri,
nung sanang malyari e ta’ papalyari,
reng mesabing dayuan e la sa’ mag-ari.
Ing Amanu tamu Amanu yang sacdal,
a menibat pa king Indu ta’ng pacamal,
e ta’ ya paburen ita’ng magmasabal,
misanmetung tamu itas ta’ ya dangal.
E. P. D.
Jan. 17, 2022