Ing bayung Clark City king kecata’ng labuad,
a mibantug ngening masanting a siudad,
ing cayang secupan bina nang malapad,
at angga king Capas buri reng panyadsad.
Ita’ng Capampangan e tamu paburen,
magmasabal tamu king kecatang balen,
misanmetung tamu itamung memalen,
bang deng datang dayuan e la mag-ari ren.
Deng cacung tutunggen a mesabing dayuan,
patye at’yu no ren king labuad ta’ng tibuan,
itang salita ra yang carelang tucyan,
ing amanu tamu mangaina ne canyan.
Paburen ta’ uari ini ing malyari;
ing Amanung Sisuan magbaba ya uri?
Inya ngeni pa mu sucat ta’ng manyuri,
ing maging dulut na ning bayung Clark City.
Ing amanu tamu dacal ne pagsubuc,
maging ding Español anyang ilang mipuc,
king mismu ta’ng labuad ila ring linucluc
ding amanu tamu milele la suluc.
Macanian minunang misamutan nala,
reng amanu tamu mengapaburen la,
uling ning salita ra reting Castila,
dacal ta’ng amanu e na migdatila.
Calupa na naman deting taga-ilug,
ing amanu tamu pilit deng papalbug,
uling ing buri ra ing canung tagalug,
ya ing manimuna king Sisuan ta’ng irug.
Inya naman sana misanmetung ta’ na,
gaua ta’ng paralan ita’ng manimuna,
magmasabal tamu king amanung mana,
e tamu paburen lalu yang mangaina.
E. P. D.
Feb. 25, 2022