Nang Apung Gusting
3/23/23 Riyadh
1
Auklub neng Tonya a ating kayabe,
ing asawang Tonyu keng karelang bale;
Atin lang gagawan a maybug yang mate,
mamyalung lang api ring adwang mipakde.
2
Ing malagung Tonya, sasyo ya king mua na.,
Animal ka Tonyo, ‘yang apalmura pa.
E ku inisip man a ika gawa ka,
At binabi me pa iyang pagkeran ta!
3
Bayu ka sa mimwa at malmura kaku
Bitasan mu pamu, sangka’ning ikit mu
E ku naman serya ing disnan mung ukdu
Nasa kung sumaup, at e ing lumoku!
4
Pauli ku nandin, ibat memasada
Apaindalanan ke ini pin dalaga
Lagpasan ke sana at e na lawen pa
Ot kabirabira mipasalampak ya.
5
Agad keng tiknangan at layun keng sopan
King pangaramak na e ne mitikdo man;
Melilyu ya kanu’t mitda panimanman,
Mikabukasan na e pa kanu mengan.
6
Sali ku nya sanang diboti’t tinape
Buri na pandisal at mapaling kape
Mangayna ya kanu’t e makagulape
Seke keng traysikel at inuli ku ne.
7
Balu mu naku man asna kung ganaka
Ustung pamanyaup e ku misip kadwa.
Imalan a laun, sinelas a luma
Binye ku no kaya rening sablasabla.
8
Yatad ku ne sana, keta pin karela
Ot mengutang ya pang aliwang gamit pa,
A e mu na buri o sinawa naka,
Makanyan mu kaming auklub keng kama.