Irvin Harvey Rivera
Siuala Ning Maliwalu/Anac Ning Baculud
September 21, 2017
Sasabyan da ila kanu ring magsalba
King bangsang lalbug na’t e mipanguisnawa
Ilang mayupayang tutung manigobra,
At mamie pamangan king balang lamesa.
Ilang pagasa ning metung a balayan
A tutuking mamyeng paintungul at dalan
Ila kanung mipuk king balang kanawan,
Gumusal, magsilbi, king Balen(g) degulan.
Misan guingcas na ning metung a bayani,
Ilang pagasa ning tutuking palipi
Ding Kayanakan a ume nang manyindi,
King panyulung na ning Balen at ning dai.
Uli mong dimut la king belwan ding malda
Balu rong piyalungan ding sablang maluka
Mayumung amanung ibat karing dila,
Ila namang pait ning karelang nasa.
Kaibat mipabustan king luklukan mipuk
King kaban ning Balen la pane gagawuk
Likwan da ka tamu king metung a suluc,
King kakalulwan king bie ra ka ta’ ipuk.
King bangsang malapit nang umeng mikutkut
Kapikakunwan ing king isip babalut
Atin la pa kayang pagasang mayabut
Ding balang taguimpang meguimbal king takut?
