(A iti Atmung Panga Dimut)
© EMS (Elorde Mendoza Sambat)
Ing Poetang Mipalaut Cordillera
Ing bayung pangimut o ing new normal
Makayaliwa pin king sadyang kimutan
Iti pepaintulut ning bayung kaayusan
Pauli ning COVID pandemyang amanuan.
King sadyang pangimut masigla ing galo
Maguing ing kalakal lalam at king babo
Ding mamamaglakbe mabilug a yatu
Matulang maglimbang karin la lilimpo.
Ing teknolohiya at itang kabiasnan
Atnang kasalusu ketang keang takbang
Ing arti’t literatura o nanung kaguiwan
Susulung, lalabung kabang gagambulan.
Ing balang pangimut king nanu mang sukad
King sadyang anyu na misna king kalapad
Dapot kabud namu mituknang meyablad
Inyang ing pandemya kabud na linimbad.
At king panyatang na a nung nu meyakit
Ing kwalta’t pibandian muli mung kapurit
Maguing ing upaya linto yaring pugit
King pwersa at bagsik ning dintang a sakit.
Bina lang mitakutan at tune mesindak
Kening COVID-19 mete ela ditak
Ulining e mayayakit pinsala na tiktak
Pati reng salunan tune menga aplak.
Dapot mibandi la reng aliwang dakal
Uli ning pandemya king yatu a dintang
Pablasang ing salut karetang mituran
Kalam nemang lubus kareng miyupayan.
Dapot makanian man oini ing kabitasan
Sukat nang abalu at kaministilan
Ning taung melalang antimurin naman
Linalang king salut a pandemyang ayan.
Kabiasnan ning tau tune mipatutwan
E mibas king Guinu agyang kapilan man
Ing keang talinu tagle nang kabiasnan
Ing king Mayupaya ena aiguitan.
Aniasa’t o tau ning Guinu lelangan
Emu pakakatas ing kekang kabilyan
Uling agyang nu pa kekang dadalpakan
Lagapak ka murin mipante king lalam.
Ume ka pin ngeni at mipakde lubus
Kimut kang marapal sigpo kang tibubus
Gamitan mung kusa king nanu mang puntus
Uluan mu ing sakit a dintang mibugnus.
Talnan mo reng gamat ding anggang mituran
King pandemyang iti a mengasalunan
Ume kang sumaup king kekang kaguiwan
Banketa ing COVID maulu’t maguisan.
Entry # 7
Katlung Galal King Ligligan Pamanyulat Poesia