© EMS (Elorde Mendoza Sambat)
Ing Poetang Mipalaut Cordillera
Nanan mu mang lawen ing sablang melalang
Nitang Mayupaya keti king sikluban
Mayagyag mung sabyan wa iti pawa ngan
King mitmung sintingan at king mitmung leguan.
Deti ngang mayakit ayabut ning mata
Pati na ing sablang emu atangal na
Pawang makatala iti ngan pin ngana
Ing anggang lelangan nitang Mayupaya.
King lub ning makaba sunis a panaun
Naturalesa pin lelangan ning Impun
Minie tune sala at tulang malabung
King taung migsoso king legua’t dalumdum.
Dapot king panamdam ning taung miglilu
King ing pakinabang ibug nang tumerku
Kanita guingcas nang “Mayupaya” yaku
Aku ing kumontrol king lelang ning Guinu.
Sinira na nangan keang inumpisan
Deng batis at ilug malino danuman
Pitput nongang kusa detanang tanaman
Digsa nong matulid ding trosung kaquewan.
Epa migkuswelu taung penibalan
Ban ya ing maningat king sablang melalang
Antimong telaga ning malam Guinung Nuan
Sana ing manyese king anggang metunggian.
Dapot ing milyari guewa ning sugapan
Kinwa nang pinupul ing e asukmaman
Agyang ena bala inimbut na pin ngan
E balang masira ing meto sikluban.
Ngeni pin akit mu ing mua nang pemuksa
Kabud na dinatang myaliuang siguada
King yatung tajimik kanita sagana
Ngening salukuyan pane namung dusa.
Taung melalang pin o naturalesa
Ngeni mipakde ka mibule king lasa
Iting lelangan na ning Guinung migkusa
Dapat mung ingatan piraplan
ipala.
Kimut kang marapal ban iti misalba
A ume king asque manibat king mula
King pangalalang na king leguan nang nasa
Ban epa mitawli mibalik king sadya.