© John Bendido
Dacal nala reng magyuyu, quetang duyan na ning daiwan,
Mayayama no menasa, dacal nalang mangalingwan,
Ing amamu ning balayan, bagya bagya malalakwan,
Anya detang bayung sibul, eno bisang balikid man.
Akakit mu ing dalumdum, king aslagan yang susuclub,
Ing amamu tang menan, ditac ditac misasacub,
Nung wari sa ketang tambor, mengalawang ya queng kilub,
Aguran mu itang dinat, iyugse mu at isakub.
Ticdo tamu balen sinta, atsat tala rening gamat,
Ing pluma iyang damputan, gulis tala keng panyulat,
Balangkas tang kawatasan, keng amanung mangasampat,
Bang kanita’y Capampangan, mangislap yang milalapat.
Ing beluan ku dimut yamu, nung wari sa ketang tingting,
Piningas ya ketang danggut, anya anti nyamung puling,
Kareng tune a poyeta, tutung e kuman taginting,
Dapot lugud keng amanu, keng pusu cu yang mamaksing.
Mibalangkas ya ing poesia
Marso 24, 2023 – Sabadu
Oras: 11:08 PM