Ugali ring miminum alac

Miyaliwa la clasi pulai a utac
ustung lalasing la ring miminum alac
ating masigla a dusuldit cacatac
at ating taimic a e man bubulad

Atin mu rin naman, caretang magaslo
minum la pang bagya ta na la cuculio
careti atin mu namang saligoso
a caring umpucan maralas mabulyo

Ding aliwa sangcan lang makiinuman
king ba la mu reting milamnan a atyan
mecad uling ala la pang bacas pengan
gagawan da rugung nasi ing pulutan

Nung mabagsic naman inuman yung alac
ding cainuman yu e yo apalambat
dapot nung serbesa na ing macayapag
tabac yu king batu miras lang cabucas

Atin pilan besis la pa mu tinage
sira no matulid, manintun nong pate
ing masulit na pa pati mikibale
king gewa rang gulu maybug pang midame

Nung ating malasing, a agad mimimwâ
e la milalaco ring mapamatulâ
antimurin naman detang mapanumâ
at ding pane mayli, king milalung tulâ

Ding aliwa naman carin da bubugnus
paginakit da king kesucalan dang lub
nung alang makialam caring macarungut
mecad cabud-abud, ating mipanumbuc

Ating masican a pamau king inum
balu ro ngan alus detang magucasyun
macabante no ren abac pang maranun
angga king dasan no carin ning dalumdum

Nung ating videoke, e la milatlat man
detang bisita mu a kecang pigsadian
ating taung ustung ya ing mecatalan
ketang micropunu, e na ne’y bili man

Cabang ating alac at ating pasali
agiang disoras na e la mamanuli
at nung ating tagan a e pa mibusni
alang capamunan, dala ra pang muli

Nung “ICA” metung ca caring mesaglawe
magbayu na ca at magpacasalese
ing inum sangcap ne, man ning pamakiabe
dapot balu mu sa itang macarine…

VHELLE V. GARCIA
NOVEMBER 27, 2016
ABU DHABI, U.A.E.

This entry was posted in PL Vhelle Garcia, Poesia, Poeta Laureado. Bookmark the permalink.

Leave a Reply

Your email address will not be published. Required fields are marked *