Tutung pamag zumba, panintunan ku na
Damdaman ku’ing tigtig, pusu maliswas ya
Bisa kung tumerak, at mag exercise pa
Deni pung bitis ku, kikirut kirut la
E pa man masyadung, ing zumba me usu
Keta king opsina, makarejistru ku
Itang Wellness Program, tutukyan ming tutu
Buri na ning head mi, ayus empleadu
Balang gatpanapun, bayu kami muli
Makayadya nangan, mag zumba na kami
Pagpag ing katawan, managus uyat mi
Kanyaman mag zumba, tutung makawili
Sablang gagawan kung, zumbang e patugut
Ala na ngan ngeni, binang makalungkut
Dening kakung butit, e na abaluktut
Uling deng butul ku, ikwa dang meputut
Tutung pagmalunan, ing panga disgrasya
E ya meningat ing, ketang manibela
Ikwa nang metudtud, anya mebangga ya
Ing kalulung aku, rugu’ing medisgrasya
Migit adwang banua, migkakasakit ku
E ku makalakad, anti nyang normal ku
Bisa kung kumayap, makalakad ustu
Ban ing sadyang gawi, makaterak naku
O Guinu pagkalub, a aku kumayap
Saup ya rin kaku, ing teterak terak
Santing ing katawan, ing sakit ayagap
Asukal king daya, akwa nang kumayap
Pipilitan ku ping, katawan salesen
Itang anggang bawal, ni e ku lalawen
Itang pigagap ku, e ku pin paburen
Anggang angga namu, lakad ku kekendeng
Basta para kaku, datang murin aldo
Kareng mamagzumba, e naku maniglo
Deretsu ku lakad, bitis ku agalo
Zumba zumba naku, aru kaswelu ko
Guinu sopan Yuku, ing kakung katawan
E ya sa paysaul, kening kasakitan
Makapag zumba ku, iti panenayan
E na lumuat aku, teterak na naman
Salamat pu! Tara magzumba tana!
*winnie.3.25.23.ciudadsanfernandu