Irvin Harvey Rivera
Siuala Ning Maliwalu/Anac Ning Baculud
November 25, 2018
Tagle na ning tawu sablang pekamatas
A uring melalang king yatu miparas
Yata, ing tawu mu’ing alang katumbalas
Nung pisasabyan ing kagiwang milikas.
Kanitang minuna king dane ning ala
Busal ning dalumdum, metukup a sala
Ala kang akit man kanitang samula
Nung aliwa’ing lumbe yang tune awaga.
Inya naman ing Dios a tune malugud
Ing karinang yatu lelangan neng bukud
Dininan neng kulul a simbul ning lugud
Yatung lelangan na santungan yang tunud.
Kaybat na ning kayang gewang pamaglalang
King yatu-karinan e kabud tinuknang
Lelangan na neman a alang pikabyang
Ing matas a uri a tawung melalang.
Megumpisa na at melalang ya’ing tawu
Bukud at aliwa a gewa ning Guinu
Dinen neng inawa ampong pangatawu,
Ating alkus at bie—–miririnang sepu.
At mikalat na la, palipi nang Adan
King yatu-karinan, karin atangalan
Nu’ man dane na ning yatung pagkarinan
Karin la sinantung, karin mengabyayan.
Aku, metung ku mung kasakmal a gabun,
Ating pusu’t diwa a mike king aun
Alkus na ning aske-salamin ne’ing napun
Ding balang melalang, ume la ngan mamun.
Tawu kung lelangan, misan magkamali
Ing ligaya’t lungkut asinup kung sag’li
Busal na ning yumu, nung muli kung sawi
King lalam ning gabun muli ku at muli.